استانا قالاسىنىڭ قوعامدىق كولىكتەرىندە جاڭا تانىمدىق جوبا ىسكە قوسىلدى, دەپ حابارلايدى Egemen.kz.
ەندى جولاۋشىلار اۆتوبۋستا ءجۇرىپ كەلە جاتىپ, قازاق تاريحىندا وشپەس ءىز قالدىرعان تۇلعالار تۋرالى اقپارات الادى. ەلوردا اكىمدىگى بۇل باستاما ۇلتتىق قۇندىلىقتاردى دارىپتەۋگە جانە تاريحي سانانى نىعايتۋعا باعىتتالعانىن مالىمدەدى.
جوبا ماقساتى قازاق حالقىنىڭ مادەنيەتى مەن تاريحىنا ەلەۋلى ۇلەس قوسقان قايراتكەرلەر تۋرالى اقپاراتتى كەڭىنەن تاراتۋ. جولاۋشىلار بەلگىلى ءبىر باعىتتاعى اۆتوبۋستارعا مىنگەن كەزدە قازاق ادەبيەتى مەن تاريحىندا ەرەكشە ورنى بار تۇلعالاردىڭ ءومىرى مەن ەڭبەكتەرى تۋرالى قىسقاشا اۋديوحابارلامالار تىڭداي الادى.
«بۇل باستاما اسىرەسە جاستار ءۇشىن ماڭىزدى. ويتكەنى ولار تاريحي تۇلعالار تۋرالى اقپاراتتى كۇندەلىكتى ومىردە ءجيى كەزدەستىرە بەرمەيدى. اۆتوبۋستاعى اۋديوحابارلامالار ولاردىڭ ءبىلىم كوكجيەگىن كەڭەيتەدى», دەيدى ۇيىمداستىرۋشىلار.
اۆتوبۋستارداعى اۋديوحابارلامالار ۇلتتىق مادەنيەت پەن تاريحتى دارىپتەۋدىڭ جاڭا ءارى ءتيىمدى قۇرالىنا اينالىپ وتىر. قازىرگى ۋاقىتتا اۋديوحابارلامالار قالانىڭ 84 باعىتىندا, جالپى 502 اۆتوبۋستا ىسكە قوسىلعان.