استانادا 16 ناۋرىز – شاڭىراق كۇنىنە وراي, اتالعان تەاتر قابىرعاسىندا تانىسىپ-تابىسقان 16 - شى جۇپتىڭ نەكەسى قيىلدى. تەاتردا ءبىر-بىرىنە ۇيلەنىپ وتباسىن قۇرعان 15 جۇپ بار. ءىس-شارا اتا-بابالارىمىزدان جەتكەن «شاڭىراق كوتەرۋ» اتتى ەرەكشە سالت-ءداستۇردى ناسيحاتتاۋدى ماقسات تۇتىپ وتىر, دەپ جازادى Egemen.kz.
16-شى جۇپ ايدوس اماندىق پەن ايدانا بولاتتىڭ نەكەلەرىن قيۋ راسىمىنە قازاق قىزدارىنىڭ سۇلۋلىق ەتالونىنا اينالعان قىز جىبەگى, قازاق كسر ەڭبەك سىڭىرگەن ءارتيسى, «قۇرمەت», «پاراسات» وردەندەرىنىڭ يەگەرى مەرۋەرت وتەكەشەۆا, قازاقستاننىڭ ەڭبەك سىڭىرگەن قايراتكەرلەرى قانات پەن سۆەتا ايتباەۆتار جانە ەلورداداعى ىرىسكەلدى قاجى مەشىتىنىڭ باس يمامى, بەلگىلى ءدىنتانۋشى-عالىم نۇرلان بايجىگىت ۇلى قاتىستى.
«تەاترىمىز اشىلعالى ءتورت جىل جارىمداي ۋاقىت بولدى. وسى ارالىقتا تەك سپەكتاكلدەردى ساحنالاۋ عانا ەمەس, ءبىزدىڭ تەاترىمىز ۇلكەن شاڭىراققا اينالدى. تەاتردا تەك قانا 15 وتباسى ەمەس, 30 ادام ءبىر-بىرىمەن ۇيلەسىپ, شاڭىراق كوتەردى. ءبىزدىڭ ۇجىمىمىزدا بىلتىردان باستاپ ەرەكشە ناۋرىزناما باستالىپ جاتىر. نەكەلەسكەن جاستاردىڭ جۇپتارى ەشقاشان جازىلماسىن!», دەدى اتالعان تەاتر ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماكسيم ۇلى.
شارا بارىسىندا نەكە قيۋ راسىمىمەن قاتار ءان شىرقالىپ, كۇي تارتىلدى. جاس وتباسىعا باتا بەرىلىپ, تىلەكتەر ايتىلدى. وتباسىلىق قۇندىلىقتار دارىپتەلدى.
ىرىسكەلدى قاجى مەشىتىنىڭ باس يمامى, بەلگىلى ءدىنتانۋشى-عالىم نۇرلان بايجىگىت ۇلى جۇپتاسقان جاستارعا باتاسىن بەرىپ, مۇسىلمانشا نەكە قيۋ ءراسىمىن جاسادى.
مارتەبەلى قوناقتار جاستارعا جۇرەكجاردى لەبىزدەرىن ءبىلدىرىپ, ەل مەن جۇرتتىڭ تەك العىستارىن الۋىن, ءومىر جولىندا اسپاندارى اشىق بولۋىن تىلەدى.
ال, شاڭىراق كوتەرىپ جاتقان ايدوس اماندىقتىڭ ايتۋىنشا, ناۋرىز مەرەكەسىنىڭ جاڭا تۇجىرىمداماسى اياسىنداعى «شاڭىراق كۇنى» جالپىۇلتتىق وتباسىلىق قۇندىلىقتار مەن كىرشىكسىز ماحاببات كۇنىنە اينالادى دەۋگە نەگىز بار.
«بۇگىن نەكەمىزدى كيەلى ساحنادا شاڭىراق كۇنىندە قيىپ جاتىرمىز. ءبىز تەاتردا تابىسقان 16-شى جۇپپىز. بۇل ءبىز ءۇشىن ەكى ەسە باقىت. الدىمىزدا ۇيلەنگەن اعا-اپكەلەرىمىز قازىر ءۇبىرلى-ءشۇبىرلى, بەرەكەسى مەن بىرلىگى جاراسقان جاراسىمدى وتباسىعا اينالىپ وتىر. الداعى ۋاقىتتا دا وسى يگى ءداستۇر جالعاسادى دەپ ويلايمىز», دەدى ول.