تەحنيكالىق جانە كاسىپتىك ءبىلىم بەرۋ ۇيىمدارى اراسىندا رەسپۋبليكالىق «توپ – 100 ستۋدەنت» كونكۋرسى باستالدى, دەپ حابارلايدى Egemen.kz.
ماقساتى – تەحنيكالىق جانە كاسىپتىك ءبىلىم بەرۋ جۇيەسىنىڭ تالانتتى جانە پەرسپەكتيۆالى ستۋدەنتتەرىن انىقتاۋ جانە قولداۋ, سونداي-اق قازاقستان ەكونوميكاسىنىڭ ءتۇرلى سالالارى ءۇشىن جوعارى بىلىكتى مامانداردىڭ كادرلىق رەزەرۆىن جاساقتاۋ.
وقۋ-اعارتۋ مينيسترلىگىنىڭ ءباسپاسوز قىزمەتىنىڭ مالىمدەۋىنشە, ۇيىمداستىرۋشى – سالا مينيسترلىگىنە قاراستى «Talap» كەاق.
بايقاۋ ءۇش كەزەڭمەن وتكىزىلەدى:
ىرىكتەۋ كەزەڭى – كوللەدج ىشىندە وتەدى;
وڭىرلىك كەزەڭ – ءار كوللەدجدەن 5 ستۋدەنت قاتىسادى;
رەسپۋبليكالىق كەزەڭ – شەشۋشى كەزەڭدە ءار ايماقتان 10 ۇزدىك ستۋدەنت سايىسقا تۇسەدى.
بايقاۋعا قاتىسۋشىلاردىڭ جۇمىستارىن ساراپشىلار: ءبىلىم بەرۋ, ونەر جانە گۋمانيتارلىق عىلىمدار, دەنساۋلىق ساقتاۋ جانە الەۋمەتتىك قامسىزداندىرۋ, جاراتىلىستانۋ عىلىمدارى, ماتەماتيكا جانە ستاتيستيكا, اقپاراتتىق-كوممۋنيكاتسيالىق تەحنولوگيالار, بيزنەس, باسقارۋ جانە قۇقىق, الەۋمەتتىك عىلىمدار جانە اقپارات, اۋىل, ورمان, بالىق شارۋاشىلىعى جانە ۆەتەريناريا, ينجەنەرلىك, وڭدەۋ جانە قۇرىلىس سالالارى, سونداي-اق قىزمەت كورسەتۋ باعىتتارى بويىنشا باعالايدى.
بايقاۋعا تەحنيكالىق جانە كاسىپتىك ءبىلىم بەرۋ ۇيىمدارىنىڭ نيەت بىلدىرگەن بارلىق ستۋدەنتتەرى قاتىسا الادى.