قر ونەركاسىپ جانە قۇرىلىس ءمينيسترى ەرسايىن ناعاسپاەۆ العاشقى جۇمىس ساپارى اياسىندا «Qarmet» اق ءىرى مەتاللۋرگيالىق زاۋىتىندا, سونداي-اق ساران قالاسىنداعى بىرقاتار ونەركاسىپ كاسىپورىندارىندا بولدى, دەپ جازادى Egemen.kz اقپارات اگەنتتىگى.
مينيستر بۇكىل زاۋىتتى كەشەندى جاڭعىرتۋ بويىنشا «9-5-5» ينۆەستيتسيالىق باعدارلاماسىنىڭ ورىندالۋ بارىسىمەن تانىستى.
بولات باسقارماسىنىڭ نەگىزگى نىساندارىنا ەكسكۋرسيا جۇرگىزىلىپ, اعىمداعى وندىرىستىك كورسەتكىشتەر, مونتاجداۋ-جوندەۋ جۇمىستارى جانە زاۋىتتىڭ اينالاسىندا شوب بەلدەۋىن قۇرۋدى كوزدەيتىن مەتاللۋرگيالىق كلاستەردى جۇزەگە اسىرۋ جوسپارلارى تۋرالى اقپارات تىڭدالدى.
مينيستر «Qarmet» اق جان-جاقتى جاڭعىرتۋ مەملەكەت باسشىسىنىڭ تاپسىرماسىنا سايكەس جۇزەگە اسىرىلىپ جاتقانىن جانە ۇكىمەتتىڭ ەرەكشە باقىلاۋىندا ەكەنىن اتاپ ءوتتى.
ينۆەستوردىڭ الدىندا ونەركاسىپتىك جانە ەكولوگيالىق قاۋىپسىزدىكتى قامتاماسىز ەتۋ, سونداي-اق ءوندىرىس قۋاتتىلىعىن ارتتىرۋ جانە ءتيىستى ساپاداعى بولات ونىمدەرىنىڭ جاڭا تۇرلەرىن يگەرۋ بويىنشا ەلەۋلى مىندەتتەر تۇر.
ونەركاسىپ جانە قۇرىلىس مينيسترلىگى بۇل باعىتتا قاجەتتى قولداۋ كورسەتەدى.
2024 جىلدىڭ سوڭىندا «Qarmet» اق-دا شويىن ءوندىرىسى 14%-عا, بولات ءوندىرىسى 18%-عا وسكەنىن اتاپ وتكەن ءجون.
2025 جىلى 3,3 ملن توننا شويىن جانە 3,7 ملن توننا بولات, تيىسىنشە 5% جانە 6% قۇرايتىن وندىرىستىك وسىمگە قول جەتكىزۋ ماقساتى قويىلعان.
مينيستر كاسىپورىن باسشىلىعىنا ينۆەستيتسيالىق باعدارلامادا كوزدەلگەن بارلىق جۇكتەلگەن مىندەتتەمەلەردى, ونىڭ ىشىندە نەگىزگى نىساندار – دومنا, ۇزىن پروكات جانە تاباق پروكات تسەحتارىن جاڭعىرتۋ بويىنشا بىرقاتار ناقتى تاپسىرمالار بەردى.