- پرەزيدەنت كەزەكتى رەت ايەلدەر مەن بالالاردىڭ قۇقىقتارىن قورعاۋ ماسەلەسىنە ەرەكشە نازار اۋداردى.
وتباسىلىق-تۇرمىستىق زورلىق-زومبىلىققا قارسى كۇرەس تۋرالى زاڭ قابىلدانعاننان كەيىن, قازاقستان رەسپۋبليكاسىنىڭ مادەنيەت جانە اقپارات مينيسترلىگى وتباسىن قولداۋ ورتالىقتارىنىڭ جۇمىسىن قايتا قۇرۋدى جۇزەگە اسىردى. ەلىمىزدە قيىن جاعدايعا تاپ بولعان وتباسىلارعا كومەكتەسۋ ماقساتىندا كەيس-مەنەدجمەنت جۇيەسى ەنگىزىلىپ, بىرىڭعاي جەلى قۇرىلدى. بۇل ءوز كەزەگىندە جۇمىستىڭ تيىمدىلىگىن ارتتىرۋعا مۇمكىندىك بەردى. بۇگىندە قازاقستاندا 104 وتباسىن قولداۋ ورتالىعى جۇمىس ىستەيدى, ال 2027 جىلعا دەيىن ولاردىڭ سانىن 208-گە دەيىن كوبەيتۋ جوسپارلانىپ وتىر, - دەلىنگەن ءمينيستردىڭ جازباسىندا.
پرەزيدەنت ءوز سوزىندە ادامي كاپيتالعا ينۆەستيتسيا سالۋدىڭ ماڭىزدىلىعىن اتاپ ءوتىپ, ەلدىڭ ينتەللەكتۋالدى جانە شىعارماشىلىق الەۋەتىن قولداۋ مەن ونى تابىستى ىسكە اسىرۋ قاجەتتىگىن ايتتى.
- مەملەكەت باسشىسى سونىمەن قاتار ەلىمىزدىڭ قۇجاتتىق مۇراسىن ساقتاۋ ماسەلەسىنە دە ەرەكشە توقتالدى. مادەنيەت جانە اقپارات مينيسترلىگى قازاقستاننىڭ جاڭا مادەني مۇرا نىساندارىن يۋنەسكو تىزىمىنە ەنگىزۋ بويىنشا بەلسەندى جۇمىس جۇرگىزۋدە. وسى ماقساتتا يۋنەسكو-نىڭ «الەم جادى» تىزىلىمىنە قازاقستاننىڭ قۇجاتتىق مۇراسىن ەنگىزۋ جانە ناسيحاتتاۋ جونىندەگى جۇمىس توبى قۇرىلدى. ونىڭ قۇرامىنا عالىمدار, ارحيۆشىلەر, ارحەولوگتار, اكادەميالىق قاۋىمداستىق وكىلدەرى مەن قوعام قايراتكەرلەرى كىردى.
يۋنەسكو-نىڭ «الەم جادى» باعدارلاماسى بويىنشا ۇلتتىق كوميتەتتىڭ قىزمەتى اياسىندا مەملەكەتتىك كەڭەسشى ەرلان قاريننىڭ توراعالىعىمەن ۇلتتىق رەەستر قۇرۋ جوسپارى ازىرلەنىپ, ەلدىڭ قۇجاتتىق مۇراسىن زەرتتەۋ جانە تولىقتىرۋ بويىنشا جۇيەلى جۇمىستار جۇرگىزىلىپ جاتىر, - دەيدى ايدا بالاەۆا.
ونىڭ پايىمىنشا, بۇل باستاما تاريحي ەسكەرتكىشتەرمەن قاتار, ۇلتتىق داستۇرلەر, ءتىل, مۋزىكا جانە قولونەردى قورعاۋعا باعىتتالعان. جاڭا نوميناتسيالاردى ازىرلەۋگە دە ەرەكشە بولىنەدى. ولاردىڭ ىشىندە ابايدىڭ «قارا سوزدەرى» قولجازبالارى, تانىمال قازاقستاندىق اۆتورلار مەن ورىنداۋشىلاردىڭ اۋديوۆيزۋالدى ارحيۆتەرى, سونداي-اق قازاقستان تاريحىنا قاتىستى بىرەگەي كينو جانە فوتوماتەريالدار بار.
- بۇعان دەيىن يۋنەسكو رەەسترىنە قوجا احمەت ياسساۋي قولجازبالارى, ارال تەڭىزىن قۇتقارۋ قۇجاتتارى جانە «نەۆادا-سەمەي» حالىقارالىق انتيادرولىق قوزعالىسىنىڭ ماتەريالدارى ەنگىزىلگەن ەدى.
پرەزيدەنت تەاتر ونەرىن دامىتۋ ماسەلەسىن دە كوتەرىپ, ورىس جانە وزگە دە ۇلتتىق تەاترلاردى قولداۋ قاجەتتىگىن اتاپ ءوتتى. بۇل ەلىمىزدەگى مادەني ارالۋاندىقتى ساقتاۋعا ىقپال ەتەدى.
مينيسترلىك ەتنيكالىق جانە ورىس تەاترلارىن دامىتۋعا ەرەكشە كوڭىل بولۋدە. بيىل ميحايل لەرمونتوۆ اتىنداعى مەملەكەتتىك اكادەميالىق ورىس دراما تەاترى مەن ناتاليا ساتس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترىنىڭ رەسەيگە گاسترولدىك ساپارى جوسپارلانعان, - دەپ جازدى مينيستر.
دەرەككە قاراعاندا, 2025 جىلى قۇددىس قوجامياروۆ اتىنداعى رەسپۋبليكالىق مەملەكەتتىك اكادەميالىق ۇيعىر مۋزىكالىق كومەديا تەاترى تۇركياعا, ال رەسپۋبليكالىق مەملەكەتتىك اكادەميالىق كورەي مۋزىكالىق كومەديا تەاترى كورەياعا گاسترولدىك ساپارمەن بارادى. بۇعان قوسا, وڭىرلىك تەاترلار حالىقارالىق فەستيۆالدەرگە بەلسەندى تۇردە قاتىسىپ جاتىر.
- اقتوبە قالاسىندا جاڭا وبلىستىق تەاتردىڭ قۇرىلىسىنا جەر تەلىمى ءبولىنىپ, جوبا-سمەتالىق قۇجاتتاما ازىرلەنىپ جاتىر. وسىنداي جۇمىستار قوناەۆ قالاسىندا دا جۇرگىزىلۋدە. سونىمەن قاتار, شىمكەنتتە جاڭا وپەرا تەاترىنىڭ قۇرىلىسىن باستاۋ ماسەلەسى قاراستىرىلىپ جاتىر. بۇل باعىتتاعى جۇمىستار ءارى قاراي كۇشەيتىلەدى.
پرەزيدەنت قازاقستاندىق كينووندىرىس پەن انيماتسيانى دامىتۋ ماسەلەسىن دە كوتەرىپ, ولاردىڭ ساپاسىن ارتتىرۋ قاجەتتىگىن باسا ايتتى.
مينيسترلىك «قازاقفيلم» كينوستۋدياسىنىڭ ۇلتتىق كينووندىرىستەگى جەتەكشى ءرولىن ساقتاپ قانا قويماي, ونى حالىقارالىق دەڭگەيگە شىعارۋدى ماقسات ەتىپ وتىر.
2024 جىلى قازاقستاندىق پروكاتقا 16 ۇلتتىق فيلم شىقتى, ال 2025 جىلى مەملەكەتتىك قولداۋ اياسىندا 14 جاڭا كوركەم فيلم مەن 2 زاماناۋي كينوتۋىندى جارىق كورەدى, - دەلىنگەن جازبادا.
ماڭىزدى قادامداردىڭ ءبىرى – زاماناۋي قۇرال-جابدىقتارمەن قامتىلاتىن انيماتسيالىق حاب قۇرۋ. بۇل حاب وتاندىق انيماتسيانىڭ دامۋ ورتالىعىنا اينالادى.
- پرەزيدەنت مەملەكەتتىك الەۋمەتتىك تاپسىرىس كريتەريلەرىن قايتا قاراۋ جانە ۇكىمەتتىك ەمەس ۇيىمدار تۋرالى زاڭنامانى جەتىلدىرۋ قاجەتتىگىن دە اتاپ ءوتتى.
مينيسترلىك وسى باعىتتا جۇمىس توبىن قۇرىپ, پروبلەمالاردىڭ ءتىزىمىن جاساپ, زاڭنامالىق جانە نورماتيۆتىك تۇزەتۋلەر ازىرلەۋدە.
مەملەكەت باسشىسىنىڭ تاپسىرماسى اياسىندا قىتاي, تۇركيا جانە رەسەيدە قازاقستان مادەني ورتالىقتارىن اشۋ ماسەلەسى قاراستىرىلىپ جاتىر. مۇنداي ورتالىقتاردىڭ قىزمەتى «مادەنيەت تۋرالى» زاڭدا بەكىتىلگەن. قازىرگى تاڭدا بەيجىڭدەگى قازاقستان مادەني ورتالىعىنىڭ ورنالاساتىن ورنى انىقتالىپ, ونىڭ تۇجىرىمدامالىق كونتەنتى ازىرلەنۋدە. بۇل ورتالىقتىڭ قۇرىلىمىندا كورمە جانە كونفەرەنتس-زال, كوۆوركينگ ورتالىعى, ۇلتتىق مۋزىكالىق اسپاپتاردى ۇيرەتۋگە ارنالعان سىنىپتار مەن تىلدىك كۋرستار قامتىلماق.
مينيسترلىك پرەزيدەنت اتاپ وتكەن بارلىق باعىتتار بويىنشا جۇمىستاردى جالعاستىراتىن بولادى, - دەيدى ايدا بالاەۆا