2019 جىلدان بەرى ەلدە 500-دەن اسا مەكتەپ, كوپتەگەن مەديتسينا, سپورت جانە باسقا دا الەۋمەتتىك نىساندار بوي كوتەرگەن. بۇل تۋرالى پرەزيدەنت قاسىم-جومارت توقاەۆ بۋرابايدا وتكەن ۇلتتىق قۇرىلتايدىڭ وتىرىسىنداعى سوزىندە ايتتى, دەپ حابارلايدى Egemen.kz اقپارات اگەنتتىگى.
مەملەكەت باسشىسىنىڭ سوزىنشە, 2019 جىلدان بەرى قازاقستان ەكونوميكاسىنىڭ ناقتى ءوسىمى 15,5 پايىز بولدى.
- ەلىمىزدىڭ ىشكى جالپى ءونىمى 288 ميلليارد دوللارعا جەتتى, ال جان باسىنا شاققانداعى ىشكى جالپى ءونىم 46 پايىزعا جۋىق ارتىپ, 14 مىڭ دوللاردان استى. سىرتقى ساۋدا اينالىمى 45 پايىزعا جۋىق ءوسىپ, 140 ميلليارد دوللار بولدى. نەگىزگى كاپيتالعا سالىناتىن ينۆەستيتسيا ءبىر جارىم ەسەگە ۇلعايدى. بىلتىر ونىڭ كولەمى 19 تريلليون تەڭگەدەن استى, - دەدى ق.توقاەۆ.
ول ءبىلىم-عىلىم سالاسىنا 5 ەسەدەن استام, كولىك سالاسىنا 3 ەسەگە جۋىق, دەنساۋلىق ساقتاۋ جانە الەۋمەتتىك قىزمەت كورسەتۋ سالاسىنا 3,5 ەسە كوپ ينۆەستيتسيا سالىنعانىن جەتكىزدى.
- وسى ۋاقىتتا 500-دەن استام مەكتەپ بوي كوتەردى. كوپتەگەن دەنساۋلىق ساقتاۋ, سپورت جانە باسقا دا الەۋمەتتىك نىساندار اشىلدى. 4400 شاقىرىمعا جۋىق اۆتوكولىك جولدارى سالىندى جانە جوندەلدى. جاڭا تەمىر جول جەلىلەرى پايدالانۋعا بەرىلدى. ونداعان ءوندىرىس ورنى ىسكە قوسىلدى, - دەپ اتاپ ءوتتى پرەزيدەنت.