اقتوبە وڭىرىندە جالپىۇلتتىق ناۋرىزنامانىڭ ونكۇندىگى اياسىندا بىرقاتار شارا ۇيىمداستىرىلىپ جاتىر. وبلىس ورتالىعىندا 14 ناۋرىز كورىسۋ كۇنىنە وراي, «امال كەلدى – جىل كەلدى» اتتى مەرەكەلىك باعدارلاما ءوتتى, دەپ حابارلايدى Egemen.kz.
ءىس-شارانىڭ ەرەكشەلىگى سول – اق كيمەشەك كيگەن 100 اجە جانە اق ورامالدى 100 كەلىن اقتوبە كوشەلەرىمەن ءجۇرىپ ءوتىپ, تۇرعىنداردى تاڭعالدىردى.
مەرەكەلىك باعدارلاما قازاق مادەنيەتىندە ايىرىقشا ورىن الاتىن, ۇرپاقتان-ۇرپاققا جالعاسىپ كەلە جاتقان ماڭىزدى ءداستۇر «باستاڭعى» كورىنىسىمەن باستالدى. ءارى قاراي كوش كەرۋەنىمەن ۇلاستى. تاريحىمىز بەن مادەنيەتىمىز ءسان-سالتانات قۇرعان كوش-كەرۋەندى «قازاق انالارى – داستۇرگە جول» قوعامدىق بىرلەستىگى, اقتوبە وبلىستىق فيليالىنىڭ انالارى, الماتى اۋدانىنىڭ انالار كەڭەسى, انالار القاسى, الماتى اۋداندىق اقساقالدار القاسى باستادى.
اقجاۋلىق اجەلەر الاڭدا جينالعان جۇرتپەن امانداسىپ, كورىسۋ ءداستۇرىن كورسەتتى, كەلىندەر ۇلكەندەرگە سالەم ەتتى.
ۇلتتىق قۇندىلىقتارىمىز دارىپتەلگەن شارا سوڭىندا اقتوبەلىكتەر جايىلعان داستارقاننان, ناۋرىز كوجەدەن ءدام تاتتى. ودان بولەك, ۇلتتىق ويىندار مەن سپورتتىق جارىستارعا قاتىسىر, كوتەرىڭكى كوڭىل-كۇيمەن تارقاستى.