بۋرابايدا ءوتىپ جاتقان ۇلتتىق قۇرىلتايدىڭ IV وتىرىسىندا قاسىم-جومارت توقاەۆ اۋىل شارۋاشىلىعىنىڭ الەۋەتى مەن ونى ءتيىمدى پايدالانۋدىڭ ماڭىزىنا توقتالدى, دەپ جازادى Egemen.kz.
«ەلىمىزدىڭ اۋەلگى مۇمكىندىكتەرىنە قاراساق, ءبىز الدەقاشان الەمدەگى الپاۋىت اگرارلىق مەملەكەتتىڭ ءبىرى بولۋعا ءتيىس ەدىك. بىراق اۋىل شارۋاشىلىعىنا جەتكىلىكتى قارجى سالىنعان جوق. بۇل سالانى جەمقورلار مەن الاياقتار يەمدەنىپ كەلدى. ولاردىڭ ىشىندە مەملەكەتتىك قىزمەتشىلەر دە بولدى. جالعان مالىمەتتەردىڭ كەسىرىنەن مەملەكەت قاعاز جۇزىندەگى مال سانىنا جىلدار بويى سۋبسيديا تولەدى. قازىر قوردالانعان ماسەلەنىڭ ءبارىن شەشىپ, اگروونەركاسىپ كەشەنىن جاڭا دەڭگەيگە كوتەرۋ ءۇشىن كوپ جۇمىس جاسالىپ جاتىر», دەدى مەملەكەت باسشىسى.
سونداي-اق پرەزيدەنت اۋىل شارۋاشىلىعى سالاسىنداعى باستى ماقساتتى ايقىندادى.
ء«بىز الداعى بەس جىلدا اۋىل شارۋاشىلىعىنىڭ جالپى ءونىمىن ەكى ەسە كوبەيتىپ, وسى سالاداعى ەڭبەك ونىمدىلىگىن ءۇش ەسە ارتتىرۋىمىز كەرەك. بۇل – وتە ماڭىزدى مىندەت», دەدى ول.
بۇعان قوسا قازاقستان 10 جىل ىشىندە بيدايدى تەرەڭ وڭدەپ, دايىن ءونىم وندىرەتىن جانە ونى الەمدىك نارىققا شىعاراتىن ەڭ ۇزدىك ون ەلدىڭ قاتارىنا قوسىلۋعا ءتيىس ەكەنىن جەتكىزدى.