ناۋرىز ايىنداعى ۇلتتىق بىرىڭعاي تەستىلەۋ (ۇبت) ءوتىپ جاتىر. عىلىم جانە جوعارى ءبىلىم مينيسترلىگىنىڭ حابارلاۋىنشا, ارالىق قورىتىندى ناتيجەسىندە ءبىر اپتادان اسا ۋاقىتتىڭ ىشىندە تەستىنى 21 مىڭعا جۋىق تالاپكەر تاپسىردى.
ناۋرىز ايىنداعى ۇبت-نىڭ ءبىرىنشى اپتاسىندا 21 مىڭعا جۋىق ادام تەستىلەۋدەن ءوتتى. ونىڭ ىشىندە 69 تالاپكەر – ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر. قاتىسۋشىلاردىڭ 62,8%-ى تەستىلەۋدى قازاق تىلىندە, 37%-ى ورىس تىلىندە, 52 ادام اعىلشىن تىلىندە تاپسىرۋدى تاڭدادى. تالاپكەرلەردىڭ باسىم بولىگى, اتاپ ايتقاندا, 18,4%-ى «ماتەماتيكا-فيزيكا» پاندەر كومبيناتسياسىن تاپسىردى. 16,1%-ى «شىعارماشىلىق ەمتيحان», 12% «بيولوگيا-حيميا» كومبيناتسياسىن تاڭداعان. ەڭ از تاڭدالعان كومبيناتسيا – «حيميا-فيزيكا». شەكتى بالدى 57%-عا جۋىق تالاپكەر جينادى. تەستىلەۋ ناتيجەسى بويىنشا ورتاشا بالل 53 بالدى (بەس ءپان بويىنشا) قۇرادى. ەڭ جوعارى بالل – 135, مۇنى اباي وبلىسىنىڭ وقۋشىسى جينادى.
تالاپكەرلەر تەستىلەۋ اياقتالعان سوڭ 30 مينۋت ىشىندە اپەللياتسياعا بەرە الادى, بۇل جاعدايدا سەرتيفيكات اپەللياتسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
ۇلتتىق تەستىلەۋ ورتالىعىنىڭ تاراتقان اقپاراتىنا سۇيەنسەك, قازىرگى تاڭدا 22 ادامنىڭ ناتيجەسى جويىلدى. ونىڭ ىشىندە 10 تالاپكەر سمارتفون جانە شپارگالكا سياقتى تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى, ال تەستىلەۋ كەزىندە ەرەجەلەردى بۇزعانى ءۇشىن اۋديتوريادان 12 ادام شىعارىلدى.
ايتا كەتسەك, بيىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.
ناۋرىز ۇبت-سى 1 ناۋرىز بەن 6 ءساۋىر ارالىعىندا وتەدى. تەستىلەۋگە قاتىسۋعا 163 مىڭعا جۋىق تالاپكەر نيەت بىلدىرگەن.