«بايتەرەك» حولدينگىنىڭ ەنشىلەس ۇيىمى, ەلىمىزدەگى تۇرعىن ءۇي قۇرىلىس جيناق جۇيەسىن جۇزەگە اسىراتىن بىردەن-ءبىر بانك – «وتباسى بانك» كليەنتتەرىنىڭ جيناق شوتتارىنا جاقىندا تىڭ قاراجات ءتۇستى. 2024 جىلدىڭ قورىتىندىسى بويىنشا تۇرعىن ۇيلەرىنە اقشا جيناپ جۇرگەن 2 134 279 وتانداسىمىز «وتباسى بانكىندەگى» دەپوزيتتەرىنە مەملەكەتتىك سىيلىقاقى الدى.
مەملەكەتتىك سىيلىقاقىنى الۋشىنىڭ ورتاشا جاسى – 35. بۇل ەلىمىزدىڭ جاس تۇرعىندارى, وسكەلەڭ ۇرپاق تۇرعىن ءۇي قۇرىلىس جيناق جۇيەسىنە سەنەدى, تۇرعىن ءۇي ماسەلەسىن شەشۋدە وسى قۇرالدى تاڭدايدى دەگەن ءسوز.
مەملەكەتتىڭ 20% مولشەرىندەگى سىيلىقاقىسى 200 اەك-تەن اسپايتىن جيناق سوماسىنا ەسەپتەلەدى. 2024 جىلى 1 اەك 3 692 تەڭگەگە تەڭ بولدى. بۇل سىيلىقاقى الۋعا جارامدى ەڭ جوعارى سوما 738 400 تەڭگەنى قۇراعانىن بىلدىرەدى. زاڭعا سايكەس, سىيلىقاقى تولەۋدى مەملەكەت قامتاماسىز ەتەدى. وسىلايشا, ول ازاماتتارىنا تەزىرەك اقشا جيناپ, قولجەتىمدى شارتتارمەن باسپانا ماسەلەسىن شەشۋگە سەپتىگىن تيگىزەدى.
مەملەكەتتىك سىيلىقاقى بۇرىن ۇستىنە اتالعان سىيلىقاقى قوسىلماعان جيناقتارعا عانا اۋدارىلادى. ياعني, بيىل جيناقتالعان قاراجات پەن وتكەن جىلى سىيلاقاقى قوسىلماعان جيناقتاردىڭ قالدىعى ەسەپكە الىنادى. ەگەر وتكەن جىلى دەپوزيتتە جيناقتالعان سوما 200 اەك-تەن اسىپ كەتسە, وندا سىيلىقاقىسىز قالعان ايىرما سوما مەملەكەتتىك سىيلىقاقىنى ەسەپتەۋ كەزىندە ەسكەرىلەدى. ەگەر ءبىر سالىمشىنىڭ بانكتە بىرنەشە سالىمى بولسا, وندا مەملەكەتتىك سىيلىقاقى ولاردىڭ بىرەۋىنە عانا ەسەپتەلەدى.
2025 جىلدىڭ قورىتىندىسى بويىنشا ەڭ جوعارى مەملەكەتتىك سىيلىقاقى كولەمى 157 280 تەڭگەگە تەڭ بولادى. وعان قول جەتكىزۋ ءۇشىن سالىمشىلار «وتباسى بانكىندەگى» شوتقا كەمىندە 786 400 تەڭگە (200 اەك) جيناقتاپ, اي سايىن دەپوزيتتەرىن شامامەن 65 533 تەڭگەگە تولىقتىرىپ وتىرۋ ءتيىس. مەملەكەتتىك سىيلىقاقى مەن بانك سىياقىسىن قوسقاندا, «وتباسى بانك» دەپوزيتتەرىنىڭ جىلدىق ءتيىمدى سىياقى مولشەرلەمەسى 14%-عا جەتەدى.