اۋىل شارۋاشىلىعى مينيسترلىگىنە قاراستى جەر رەسۋرستارىن باسقارۋ كوميتەتىنىڭ باستاماسىمەن س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىندە ماراپاتتاۋ شاراسى ءوتتى, دەپ حابارلايدى Egemen.kz.
سالا مينيسترلىگىنىڭ ءباسپاسوز قىزمەتىنىڭ مالىمدەۋىنشە ناۋرىز ايىنىڭ ەكىنشى سەنبىسى – جەرگە ورنالاستىرۋ, گەودەزيا جانە كارتوگرافيا كۇنى سانالادى. ماراپاتتاۋ شاراسىنىڭ اشىلۋىندا اشم ۆيتسە-ءمينيسترى ە.تاسجۇرەكوۆ, ۇلتتىق عىلىم اكادەمياسىنىڭ اكادەميگى ز.دۇيسەنبەكوۆ, ءماجىلىس دەپۋتاتى ن.اشىمبەتوۆ قۇتتىقتاۋ لەبىزدەرىن جەتكىزدى.
«سىزدەردىڭ بىلىكتىلىكتەرىڭىزدىڭ ارقاسىندا جەر رەسۋرستارىن باسقارۋ جۇيەسى جەتىلدىرىلىپ, تۇراقتى دامىپ كەلەدى. زالدا بولاشاق جەرگە ورنالاستىرۋشى, گەودەزيست جانە كارتوگراف مامان بولاتىن ستۋدەنتتەر وتىر. سىزدەر وسى سالانىڭ ەرتەڭى, ەلىمىزدىڭ بولاشاعىسىزدار», دەدى ە.تاسجۇرەكوۆ.
شارا بارىسىندا جەر سالاسىندا تالاي جىل ۇزدىكسىز قىزمەت جاساپ كەلە جاتقان ماماندار ەڭبەگى جوعارى باعالانىپ, 17 ازامات «قۇرمەتتى جەرگە ورنالاستىرۋشى» سالالىق توسبەلگىسىمەن, 29 مامان «ۇزدىك جەرگە ورنالاستىرۋشى» قۇرمەت ديپلومىمەن ماراپاتتالدى.