بۇگىن ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانباەۆ قازاقستان اۋماعىنىڭ 71 پايىزىن قار باسىپ جاتقانىن مالىمدەدى. سونداي-اق, اقتوبە, قوستاناي, قاراعاندى, اقمولا, سولتۇستىك قازاقستان, شىعىس قازاقستان وبلىستارى جانە ۇلىتاۋ جانە اباي وبلىستارىندا سۋ تاسقىنى قاۋپى جوعارى ەكەنى انىقتالىپ وتىر. وسىعان بايلانىستى ولجاس بەكتەنوۆ ايماق باسشىلارىنا بىرقاتار تاپسىرما بەردى, دەپ جازادى Egemen.kz.
پرەمەر-مينيستر ولجاس بەكتەنوۆ ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ الداعى سۋ تاسقىنى كەزەڭى قارساڭىندا اۋا رايىنىڭ بولجامى تۋرالى بايانداماسىن تىڭداعاننان كەيىن, وبلىس اكىمدەرىنە سۋ تاسقىنىنا دايىندىقتى باقىلاۋدا ۇستاۋدى تاپسىردى.
«سۋ تاسقىنى كەزەڭىنىڭ باستالۋىنا دا كوپ ۋاقىت قالعان جوق. اكىمدەر بۇل ماسەلەنى ەرەكشە باقىلاۋعا الۋى قاجەت. توتەنشە جاعداي تۋرالى حالىقتى حاباردار ەتەتىن بارلىق جۇيەنىڭ تۇراقتى جۇمىسىن قامتاماسىز ەتىڭىزدەر. الەۋمەتتىك جەلىلەر مەن بۇقارالىق اقپارات قۇرالدارىندا اقپاراتتىق-ءتۇسىندىرۋ جۇمىستارىن كۇشەيتۋ كەرەك. توتەنشە جاعدايلار مينيسترلىگى سۋ تاسقىنىنا تولىعىمەن دايىن بولۋعا ءتيىس. سونداي-اق ورتالىق جانە جەرگىلىكتى مەملەكەتتىك ورگانداردىڭ جۇمىسىن ۇيلەستىرۋدى قامتاماسىز ەتسىن», دەدى ولجاس بەكتەنوۆ. سونداي-اق ۇكىمەت باسشىسى تاياۋدا وسى ماسەلەگە قاتىستى رەسپۋبليكالىق جەدەل شتابتىڭ وتىرىسىن وتكىزۋگە دايىندىقتى باستاۋعا تاپسىرما بەردى.