بۇگىن ۇكىمەت وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانباەۆ ەل اۋماعىنىڭ 71 پايىزىندا قار جاتقانىن حابارلادى, دەپ جازادى Egemen.kz.
دەگەنمەن بۇل كورسەتكىش وتكەن جىلدىڭ وسى كەزەڭىمەن سالىستىرعاندا 15 پايىزعا از.
ەلىمىزدىڭ وڭتۇستىگىندەگى قىزىلوردا, تۇركىستان جانە جامبىل وبلىستارىندا, باتىسىندا باتىس قازاقستان, اتىراۋ جانە ماڭعىستاۋ وبلىستارىندا قار ەرىپ جاتىر.
«ناۋرىز ايىندا تەمپەراتۋرا كوتەرىلىپ, جاۋىن-شاشىن كوپ بولسا ەرىگەن قار سۋىنان تاۋ وزەندەرىندە تاسقىن ءجۇرۋى مۇمكىن. ورتالىق, سولتۇستىك جانە شىعىس ايماقتاردا قار قالىڭ, ناۋرىز ايىندا جاۋىن-شاشىن مولشەرى ايلىق نورمادان ەكى جانە ودان دا كوپ تۇسەدى دەپ كۇتىلىپ وتىر. مىسالى, استانادا ءبىرىنشى ونكۇندىكتىڭ وزىندە ايلىق جاۋىن-شاشىن مولشەرى ءتۇستى», دەدى ەرلان نىسانباەۆ.