Air Astana اۋە كومپانياسىنىڭ اقتاۋدان الماتىعا باعىت العان ۇشاعى قوزعالتقىشىنداعى اقاۋعا بايلانىستى اۋەجايعا ورالۋعا ءماجبۇر بولدى, دەپ جازادى Egemen.kz اقپارات اگەنتتىگى.
اۋە تاسىمالىنىڭ ءباسپاسوز قىزمەتى ۇشاقتى قوزعالتقىشتاعى اقاۋعا بايلانىستى اۋەجايعا قايتا قونعانىن راستادى.
الەۋمەتتىك جەلىدە Air Astana-نىڭ اقتاۋدان ۇشقان ۇشاعىنىڭ 20 مينۋتتان كەيىن "قوزعالتقىشى ىستەن شىقتى" دەگەن اقپارات پايدا بولدى.
“كابيناداعى ەلەكتر جارىعى ءوشىپ, سۇمدىق گۋىل مەن كۇيىك ءيىسى شىقتى. بورت سەرىكتەر ايتارلىقتاي قوبالجىدى, ارى-بەرى جۇگىرىپ ءجۇردى. بىراق ادامدار سابىر ساقتاپ, تىنىش وتىردى. ءبىر-بىرىنە قاراپ, نە بولىپ جاتقانىن تۇسىنبەدى”, – دەپ جازدى جەلى قولدانۋشىسى.
ونىڭ سوزىنشە, ەكيپاج كومانديرى قوزعالتقىشتىڭ ىستەن شىققانىن جانە اقتاۋعا قايتا قوناتىنىن حابارلاعان.
“ۇشاق كۇرت تومەندەپ دىرىلدەي باستادى. جىلدامدىق پەن بيىكتىك تومەندەدى. الايدا ءبىز اۋەجايدان الىس ەدىك. بىردە سىقىرلاعان دىبىس شىقتى. ءبىرى دۇعا وقىدى, ەندى ءبىرى جامان ويدان ارىلۋدى ويلاپ جاي عانا وتىردى. جەرگە قونعاندا وتىرعاندار كوزىنە جاس الىپ, جەڭىلدەندى”, – دەلىنگەن جازبادا.
Air Astana اۋە كومپانياسىنىڭ مالىمەتىنشە, 2025 جىلى 8 ناۋرىز كۇنى اقتاۋ-الماتى باعىتىندا ۇشقان كس 868 رەيسى ۇشىپ, اۋەجايعا قايتا ورالدى.
“ەكيپاج №1 قوزعالتقىشتاعى ماي دەڭگەيىنىڭ تومەندىگى تۋرالى تەحنيكالىق ەسكەرتۋگە قالىپتى پروتسەدۋرالارعا سايكەس قوزعالتقىشتى ءوشىرىپ, جاۋاپ بەردى. ۇشاق اقتاۋعا قاۋىپسىز قوندى. جولاۋشىلار رەزەرۆتىك ۇشاقپەن كومپانيالار توبىنا جەتكىزىلدى”, – دەلىنگەن حابارلامادا.