باتىس قازاقستان وبلىسىنىڭ اقجايىق اۋدانىنا قاراستى تايپاق اۋىلىندا ىسكەر ايەلدەر فورۋمى ءوتتى, دەپ حابارلايدى Egemen.kz.
«ايەل جانە بيزنەس. جاڭا مۇمكىندىكتەر» دەگەن تاقىرىپپەن وتكەن فورۋمعا قاتىسۋشىلار اۋەلى تايپاق اۋىلىنداعى ءجۇن وڭدەۋ تسەحىنىڭ جۇمىسىمەن تانىستى. اقجايىق اۋداندىق ىسكەر ايەلدەر كەڭەسىنىڭ ءتورايىمى ءلاززات سەيىتكەرەەۆا جەتەكشىلىك ەتەتىن تسەحتىڭ اشىلعانىنا كوپ ۋاقىت وتكەن جوق. بىراق اتاعى اۋدان-وبلىس اسىپ, رەسپۋبليكاعا تانىلدى. تايپاق شەبەرلەرىنىڭ قولىنان شىققان ونىمدەر سوڭعى ەكى جىلدا بىرنەشە حالىقارالىق كورمەگە قاتىسىپ, ۇلىبريتانيا, گەرمانيا, يتاليا, ت.ب. شەت ەلدەرگە جول تارتتى. جاپونيادان اكيحيسا كاراگۋچي اتتى دارىسكەر ارنايى كەلىپ, ءجۇن ونىمدەرىن دايىنداۋ بويىنشا قۇندى كەڭەس بەردى. ءاۋ باستا تسەح ىسمەرلەرى ءجۇندى جۋ, تازارتۋ, ءتۇتۋ, باسۋ سىندى جۇمىستى قولمەن اتقاراتىن. بۇگىندە بۇل ءىستىڭ ءبارى اۆتوماتتاندىرىلعان. جۋىردا ءلاززات مۇراتقىزى «اۋىل اماناتى» جوباسىمەن جەڭىلدەتىلگەن نەسيە الىپ, رەسەيدەن قاجەت تەحنيكانى الدىرتىپتى. قازىر بۇل تسەحتان سۋۆەنيرلىك بۇيىمدار, اياق كيىم, باس كيىم, كورپە, سومكە شىعارىلىپ, ءجۇندى ءتۇتۋ, جۋ قىزمەتى كورسەتىلەدى.
تسەح جۇمىسىمەن تانىسقان سوڭ فورۋمعا قاتىسقان قىز-كەلىنشەكتەر مەملەكەتتىك باعدارلامالار ارقىلى كاسىپ باستاۋ, بيزنەستى ورىستەتۋ بويىنشا شەبەرلىك دارىستەرىن تىڭدادى.
ءىس-شارا اياسىندا اۋدان ىسمەرلەرىنىڭ قولونەر كورمەسى ۇيىمداستىرىلدى.
«بولاشاعىن ادال ەڭبەكپەن كوركەيتكىسى كەلەتىن نازىك جاندى كاسىپكەرلەردىڭ باستاماسىن, ىنتا-ىقىلاسىن ءبىز ۇنەمى قولدايمىز. اۋدانىمىزدىڭ الەۋمەتتىك-ەكونوميكالىق تىنىس-تىرلىگىندە ايشىقتى ءىز قالدىرعان الدىڭعى بۋىن وكىلدەرىنىڭ ەڭبەگى دە اسا باعالى. بۇگىنگى ءداۋىر – قولىنان ءىس كەلەتىن, العىر, شەبەر جانە جۇمىسىنا ادال, ەڭبەكقور, باسەكەلەستىككە قابىلەتتى جانداردىڭ زامانى. بيىلعى جۇمىسشى ماماندىقتار جىلىندا ولاردىڭ ەڭبەگى لايىقتى باعالانۋى ءتيىس», دەپ اتاپ ءوتتى اقجايىق اۋدانىنىڭ اكىمى مۇرات سەردالين.
فورۋم كەزىندە قولونەر شەبەرى, زەينەتكەر ساۋلە نۇرعاليەۆا كاسىپتىڭ جاس تالعامايتىنىن, ەگدە تارتقان شاقتا دا تابىسقا جەتۋگە بولاتىنىن ءوز مىسالىمەن ايتىپ بەردى. ول وتكەن جىلى دۇنيەجۇزىلىك كوشپەندىلەر ويىندارىندا استانا قالاسىندا 11 200 شارشى مەتر الاڭعا جايىلعان 450 كورپەنى قۇراعان قولونەر شەبەرلەرىنىڭ ءبىرى. ەسىمى كينەس رەكوردتار كىتابىنا ەنگەن ساۋلە اپاي قازاق ۇلتتىق قولونەرىنىڭ اشىلماي جاتقان الەۋەتى ءالى كوپ ەكەنىن ايتادى.
ء«بىزدىڭ ەلدە ايەل-اناعا بارلىق مۇمكىندىك بار. «وتباسى, وشاق قاسى» دەگەن ءسوز بۇرىنعىنىكى, قازىرگى ايەل – ءۇيدىڭ دە, ءتۇزدىڭ دە ادامى. بالا ءوسىرۋ, وتباسىنىڭ قامىمەن قاتار بىزگە ەلىمىزدى وركەندەتۋ ميسسياسى ەرلەرمەن تەڭ جۇكتەلگەن. وكىنىشكە قاراي, قوعامدا قازىر ماسىلدىق, مەملەكەتكە الاقان جايۋ باسىم. سوندىقتان ىسكەر ايەلدەر جۇمىلىپ, تىرلىكتى تۇلەتكىڭ كەلسە, تەك ءوز ەڭبەگىڭە كۇش-جىگەرىڭە سۇيەنۋ قاجەتتىگىن كورسەتەيىك», دەدى تانىمال تەلەجۇرگىزۋشى, كاسىپكەر گۇلناز الىمگەرەي. ول قازىر ورال قالاسىنان «تاسپا-LAB» ستۋدياسىن اشىپ, قازاقى سالت-ءداستۇردى ناسيحاتتاپ ءجۇر. ءبىر عاجابى, «تاسپا-LAB» ستۋدياسى جەرگىلىكتى ىسمەرلەردىڭ قولىنان شىققان بۇيىمدارمەن ارلەنگەن.
ال اقبۇلاقتىق قارلىعا مولداعاليەۆا «اۋىلدا جۇمىس جوق» دەگەن پىكىرمەن كەلىسپەيتىنىن ايتىپ, جۇرتتىڭ قالاعا ۇدەرە كوشۋىنە الاڭدايتىنىن ايتادى. ونىڭ پىكىرىنشە بۇل كوشتى توقتاتۋدىڭ بىردەن-ءبىر شەشىمى – اۋىلدا ءوندىرىس ورىندارىن اشۋ. ال مۇنداي كاسىپكەرلىك نىساندارىن ىسكەر ايەلدەر دە اشسا, نۇر ۇستىنە نۇر.