ششۋچە-بۋراباي كۋرورتتىق ايماعىن دامىتۋدىڭ جوسپارى بەكىتىلدى

قۇجات 137,2 ملرد تەڭگەگە 118 ءىس-شارانى قامتيدى جانە تۋريستىك ينفراقۇرىلىمدى, كولىك لوگيستيكاسىن, تسيفرلىق شەشىمدەردى, قاۋىپسىزدىك جۇيەسىن دامىتۋعا, سونداي-اق ينۆەستيتسيالار تارتۋعا باعىتتالعان.

ۇكىمەت مالىمەتىنشە, بۇل جوسپارعا سايكەس, دەمالىس ورنىن جاڭعىرتۋ نەگىزگى باعىتتاردى, سونىڭ ىشىندە جىل بويى جۇمىس ىستەيتىن تۋريستىك نىساندار سالۋدى, ەكولوگيالىق جانە سپورتتىق ءتۋريزمدى دامىتۋدى, جاڭا رەكرەاتسيالىق ايماقتار قۇرىلىسىن قامتيدى. اتاپ ايتقاندا, قاتاركول كولىنىڭ جانىندا بالالار ورتالىقتارىن, سپورتتىق-ساۋىقتىرۋ كەشەندەرىن جانە جىل بويى اكۆاپارك ۇيىمداستىرۋ قاراستىرىلىپ وتىر. جۇكەي كولىنىڭ ماڭىندا كەمپينگتەر, گلەمپينگتەر جانە جاڭا تۋريستىك باعىتتار اشىلادى. ال كىشى شاباقتى كولىندە جالعا بەرۋ ستانسالارى, قايىق تۇراعى, جاعالاۋ ينفراقۇرىلىمى مەن جاعاجايلار بولادى.

قىسقى دەمالىس تۇرلەرىن دامىتۋ دا كەڭىنەن جوسپارلانعان. ولاردىڭ اراسىندا شاڭعىمەن سىرعاناۋ ەرەكشە سۇرانىسقا يە. سپورتتىق جابدىقتاردى جالعا بەرەتىن, تاماقتانۋ ورنى مەن كادەسىي دۇكەندەرى بار شاڭعى بازاسىن ۇيىمداستىرۋ كوزدەلگەن. كۋرورتتىق ايماققا اپاراتىن جولدار مەن كولىك ينفراقۇرىلىمىن دامىتۋعا دا دەن قويىلادى, ونىڭ ىشىندە ۆيزيت-ورتالىقتارى بار كوپ دەڭگەيلى تۇراقتار جانە تاماقتانۋ پۋنكتتەرى سالىنادى.وسى جوسپار ارقىلى كەلۋشى تۋريستەر سانىنىڭ 35 مىڭنان 94 مىڭ ادامعا دەيىن ۇلعايۋىنا, تۋريزم سالاسىنداعى جۇمىسپەن قامتۋ كورسەتكىشىنىڭ 22 مىڭنان 32,5 مىڭ ادامعا دەيىن وسۋىنە جانە 22,7 ملرد تەڭگە مولشەرىندە جەكە ينۆەستيتسيالار تارتۋعا اكەلەدى دەپ كۇتىلۋدە. ءوڭىر ەكونوميكاسىنداعى تۋريزم ۇلەسى 1,4%-دان 3,5%-عا دەيىن ۇلعايتۋ كوزدەلگەن.