«قازاق گازەتتەرى» مەن «وتانداستار قورى» سەرىكتەستىك ورناتتى

جيىنعا مودەراتورلىق ەتكەن «قازاق گازەتتەرى» باسشىسى ديحان قامزابەك ۇلى ەلىمىزدىڭ باس باسىلىمدارى شەكارانىڭ ارعى شەبىندەگى قازاقتاردىڭ قال-احۋالىن  ۇنەمى زەردەلەپ, ەل نازارىنا ۇسىنىپ وتىرعانىن اتاپ ءوتتى.

«حح عاسىردىڭ باسىندا قازاق حالقى الاعاي-بۇلاعاي شاقتاردى باستان وتكەردى. ءتۇرلى مەملەكەتتەرگە تارىداي شاشىلدى. سونداي سىندارلى كەزدە ۇلتتىق ءباسپاسوز وزگە ەلدە تۇرىپ جاتقان قازاق دياسپوراسىنىڭ تۇرمىسى, وقۋى, قىزمەتى تۋرالى اقپاراتتارمەن قۇلاقتاندىرىپ وتىردى. قازىرگى كۇندە دە بۇل جاۋاپكەرشىلىك قازاق گازەتتەرىنىڭ موينىنان تۇسكەن جوق. قانداستارىمىزعا جان-جاقتى قولداۋ كورسەتىپ وتىرعان «وتانداستار قورىمەن» بىرىگىپ جۇمىس ىستەۋگە ءازىر ەكەندىگىمىزدى مالىمدەيمىز», دەدى د.قامزابەك ۇلى.

ايتا كەتەيىك «وتانداستار قورى» – شەتەلدەگى قازاقتارمەن مادەني-گۋمانيتارلىق قارىم-قاتىناستى نىعايتۋ نەگىزىندە ولاردىڭ ۇلتتىق بىرەگەيلىگىن ساقتاۋ جانە ەلىمىزگە ورالعان قانداستارىمىزعا اقپاراتتىق قولداۋ كورسەتۋ ماقساتىندا قۇرىلعان اكتسيونەرلىك قوعام. ونىڭ باسشىسى دانيار قادىروۆ تا «قازاق گازەتتەرى» ۇجىمىنا ريزاشىلىعىن ءبىلدىرىپ, سىرتتاعى قانداستاردىڭ الەۋەتىن ۇلت مۇددەسىنە ءتيىمدى پايدالانۋ كەرەكتىگىن جەتكىزدى.

مەموراندۋم اياسىندا ەكى تاراپ  شەتتە جۇرگەن ەتنيكالىق قازاقتاردى تاريحي وتانىنا شاقىرۋ, ولاردىڭ ىشىندە ءوز سالاسىندا ۇزدىك ناتيجەگە جەتكەن بىلىكتى ازاماتتاردى ەلگە ناسيحاتتاۋ, سونداي-اق قازاقتار كوپ شوعىرلانعان ايماقتارعا قازاق باسىلىمدارىن جەتكىزۋ سياقتى ماڭىزدى جوبالاردى تالقىلادى.