ءتۇننىڭ قۇشاعى سەيىلىپ, قاراڭعىلىقتىڭ ەتەگى سوگىلە باستاعان شاق. جان دۇنيەنى تىنىشتىق بيلەگەن وسى ءبىر مىزعىماس مەزەتتە جۇرەك باسقا ىرعاقپەن سوعادى. سەبەبى, بۇل – سارەسى ۋاقىتى. اللانىڭ ەرەكشە مەيىرىمى مەن بەرەكەسى توگىلەتىن, تاڭعى تىنىشتىققا تۇنعان قاسيەتتى ءسات.
سارەسى – جاي عانا تاڭعى اس ەمەس, ول – جۇرەككە قۇيىلعان رۋحاني قۋات, دەنەگە بەرىلگەن نىعمەت, ورازانىڭ العاشقى قادامىنداعى ساۋاپتىڭ باستاۋى. بۇل ۋاقىتتى بەكەرگە وتكىزبەي, تاماقتانۋ ارقىلى اللانىڭ بەرگەن ريزىق-نەسىبەسىنە شۇكىر ەتۋ – مۇسىلمان ءۇشىن ۇلكەن مارتەبە بولماق.
پايعامبارىمىز (س.ع.س.) : «سارەسىدە بەرەكە بار, ونى تاستاماڭدار» – دەپ, وسى ۋاقىتتىڭ قادىرىن ۇعىنۋعا شاقىرعان. ويتكەنى سارەسى – سابىردى شىڭدايتىن, بويعا كۇش سىيلايتىن, دۇعاعا شەكسىز مۇمكىندىك بەرەتىن ەرەكشە ۋاقىت بولىپ ەسەپتەلەدى.
بۇل ۋاقىتتا ويانۋ تەك ءتاندى ازىقتاندىرۋ ەمەس, جاندى دا سەرگىتۋ. قۇپيالى ءتۇننىڭ سوڭعى بولىگى – اللانىڭ قۇلدارىنا ەڭ جاقىن بولاتىن كەز. وسى ۋاقىتتا جاسالعان دۇعا قايتارىلمايدى, بۇل ۋاقىتتا ەتكەن عيبادات جۇرەكتى نۇرلاندىرادى. ادامزات بالاسى تاڭمەن بىرگە تىرشىلىككە ارالاسسا, مۇسىلمان سارەسىمەن كۇنىن باستايدى. ويتكەنى, بۇل ۋاقىتتا جەگەن ءدام بويعا قۋات قانا ەمەس, ساۋاپ تا قۇيادى ەكەن. ءبىر ءتىلىم نان, ءبىر جۇتىم سۋ بولسا دا, نيەتپەن ىشىلگەن سارەسى اللانىڭ راقىمىنا بولەيدى.
عالىمدار دالەلدەگەندەي, تاڭعى ۋاقىتتا دۇرىس تاماقتانۋ اعزانىڭ كۇنى بويى قۋاتتانۋىنا كومەكتەسەدى. سارەسىدە اعزاعا ۇزاق ۋاقىت قۋات بەرەتىن, دارۋمەنگە باي تاعامداردى تاڭداعان ءجون. اتاپ ايتساق, اقۋىزعا تولى تاعام, سۋىق سۋدىڭ ورنىنا جىلى سۋ, مايلى استان گورى جەڭىل ءارى ءنارلى اس – مىنە, سارەسىنىڭ دۇرىس ءوتۋىنىڭ كەپىلى بولادى. سونىمەن قاتار اللا ەلشىسى سارەسىگە قۇرما جەۋدى وسيەت ەتىپ: «قۇرما – سارەسىگە نەندەي جاقسى» – دەگەن ەكەن.