مەملەكەت باسشىسىنىڭ تاپسىرماسىنا سايكەس, بالاباقشالاردى ىسكە قوسۋ بويىنشا 2023-2027 جىلدارعا ارنالعان قادامدىق جوسپار بەكىتىلگەن. قر وقۋ-اعارتۋ مينيسترلىگىنىڭ مالىمەتىنشە, 2025 جىلعا قاراي 2 جاستان 6 جاسقا دەيىنگى بالالاردى مەكتەپكە دەيىنگى بىلىممەن قامتۋ 95%-عا جەتكىزىلەدى, دەپ حابارلايدى Egemen.kz.
بۇل ماقساتقا جەتۋ ءۇشىن 2025 جىلعا دەيىن 64 مىڭ جاڭا ورىن اشۋ جوسپارلانعان. 2024 جىلدىڭ باسىنان بەرى 1,6 مىڭ ورىندىق 20 مەكتەپكە دەيىنگى ۇيىم ىسكە قوسىلعان. جالپى, 2027 جىلعا دەيىن مەكتەپكە دەيىنگى ۇيىمداردا قوسىمشا 300 مىڭ ورىن اشۋ كوزدەلگەن. بۇگىندە قازاقستاندا 11,6 مىڭ بالاباقشاعا 1 ميلليونعا جۋىق بالا بارادى.
«ۆاۋچەرلىك قارجىلاندىرۋ جۇيەسى ىسكە قوسىلعان ساتتەن باستاپ اتا-انالارعا 99 مىڭ ۆاۋچەر بەرىلدى, بۇل ولار ءۇشىن بالاباقشانى ءوز بەتىنشە تاڭداۋ مۇمكىندىگى. مەملەكەتتىك قاراجاتتىڭ بەلگىلى ءبىر ۇيىمعا ەمەس, ناقتى بالاعا باعىتتالىپ جۇمسالۋى – قارجىلاندىرۋ مەحانيزمىن جاريالى ەتەدى. پيلوتتىق جوباعا تاراز, تۇركىستان, شىمكەنت, ورال جانە استانا قالالارى قاتىسۋدا. وڭىرلەردىڭ دايىندىعىنا قاراي باعدارلاما كەڭەيتىلەتىن بولادى», دەدى قر وقۋ-اعارتۋ مينيسترلىگىنىڭ مەكتەپكە دەيىنگى ءبىلىم دەپارتامەنتىنىڭ ديرەكتورى مانار اداموۆا.
ايتا كەتەيىك, مەكتەپكە دەيىنگى ءبىلىم بەرۋمەن قامتۋدى ارتتىرۋ جۇمىس جاساپ تۇرعان بالاباقشالاردى سالۋ, رەكونسترۋكتسيالاۋ, جاڭعىرتۋ, شاعىن ورتالىقتار سانىن ارتتىرۋ, سونداي-اق مەملەكەتتىك تاپسىرىستى ۆاۋچەرلىك قارجىلاندىرۋ ارقىلى ەنگىزۋ ەسەبىنەن جۇرگىزىلەدى.