قاراعاندى. 19 ماۋسىم. وسى جىلدىڭ قاڭتار ايىندا جەرگە قۇلاعان ان-2 ۇشاعىنىڭ اپاتىن تەكسەرۋ كوميسسياسى وقيعانىڭ نەدەن بولعان سەبەبىن انىقتادى. كوميسسيا قورىتىندىسىنا سەنسەك, اپات – ۇشاق ەكيپاجىنىڭ اۋا رايىنىڭ قولايسىز جاعدايىندا بيىكتىك قاۋىپسىزدىگىن ساقتاماۋىنان بولعان ەكەن. بۇل تۋرالى ينۆەستيتسيالار جانە دامۋ جونىندەگى مينيسترلىكتىڭ ءباسپاسوز قىزمەتى حابارلادى.
«ان-2 ەكيپاجىنىڭ جەردەگى باعدارمەن بايلانىسپاي بيىكتىكتى تومەندەتۋ تۋرالى نەگىزسىز شەشىمى اۋە كەمەسىنىڭ جەرمەن سوقتىعىسۋىنا اكەپ سوققان», – دەلىنگەن اتالعان مينيسترلىكتىڭ حابارلاماسىندا.
بەكىتىلگەن قورىتىندى ەسەپ الدىن-الا تەرگەۋ امالدارىن جۇرگىزگەن ىشكى ىستەر مينيسترلىگى مەن باس كولىك پروكۋراتۋراسىنا جىبەرىلەدى.
ەسكە سالساق, بيىلعى جىلدىڭ 20 قاڭتارىندا جامبىل وبلىسىنداعى «شاتىركول» كەنىشىنىڭ ماڭىندا قالىڭ تۇماندا جەرگە قونباق بولعان ان-2 ۇشاعى اپاتقا ۇشىراعان بولاتىن. ۇشاقتىڭ بورتىندا 7 ادام بولعان, ونىڭ ۇشەۋى ەكيپاج مۇشەلەرى. اپاتتان ەكيپاج مۇشەلەرىنىڭ بارلىعى جانە دە 3 جولاۋشى قايتىس بولدى. بۇلاردىڭ ءبارى دە «قازاقمىس» كورپوراتسياسىنىڭ قىزمەتكەرلەرى-تۇعىن. ال كومپانيانىڭ تاعى ءبىر قىزمەتكەرى اسەم شاياحمەتوۆا قۇداي ساقتاپ, سول اپاتتان امان قالعان بولاتىن. قازىرگى ۋاقىتتا ول استانادا ەمدەلىپ جاتىر.
اپاتقا ۇشىراعان ۇشاق 1973 جىلى جاسالىپ شىققان, «وليمپ ەير» جشس-ءنىڭ مەنشىگى (تاپسىرىس بەرۋشى – «بالقاشتۇسمەت» ءوب, «قازاقمىس» جشس كورپوراتسياسى). 2002 جىلى بۇل اۋە كەمەسى اقتوبەنىڭ اۆياجوندەۋ زاۋىتىندا كۇردەلى جوندەۋدەن وتكەن ەكەن. 2007 جىلى ونى «قازاقمىس» كومپانياسى ساتىپ الىپتى.
قايرات ءابىلدينوۆ.
دەرەك: ينۆەستيتسيالار جانە دامۋ جونىندەگى مينيسترلىكتىڭ ءباسپاسوز قىزمەتى.
سۋرەت: tengrinews.kz.