بۇل تۋرالى وكق الاڭىندا وتكەن دوڭگەلەك ۇستەل بارىسىندا «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى گاجدەمبەك تۇرسىنوۆ مالىمدەدى, دەپ حابارلايدى Egemen.kz.
ەكىنشى جىل قاتارىنان اۋىل مەكتەپتەرىنىڭ وقۋشىلارىنا ارنالعان رەسپۋبليكالىق پاندىك وليمپيادا وتكىزىلىپ كەلەدى. 2024 جىلى مەكتەپىشىلىك كەزەڭدە 113 مىڭنان استام وقۋشى تىركەلدى, بۇل 2023 جىلمەن سالىستىرعاندا 35 مىڭعا ارتىق.
«ونىڭ قورىتىندىسى بويىنشا جۇلدەلى ورىندارعا يە بولعان اۋىل وقۋشىلارىنىڭ سانى 10 ەسەگە ارتتى. اۋىل مەكتەپتەرىنىڭ وقۋشىلارىن زياتكەرلىك وليمپيادالار مەن كونكۋرستارعا دايىنداۋ ءۇشىن «دارىن» ونلاين مەكتەبى ىسكە قوسىلدى. قازىر وندا II رەسپۋبليكالىق اۋىلدىق وليمپيادانىڭ 1 مىڭعا جۋىق ءفيناليسى بىلىمدەرىن جەتىلدىرىپ جاتىر», دەپ اتاپ ءوتتى گ.تۇرسىنوۆ.