ءماجىلىس سپيكەرى ەرلان قوشانوۆتىڭ توراعالىعىمەن بيۋرو ءوتىپ, الداعى جالپى وتىرىستىڭ كۇن ءتارتىبى ناقتىلاندى.
دەپۋتاتتاردىڭ تالقىلاۋىنا ءبىرىنشى وقىلىمدا استانانى جانە رەسپۋبليكالىق ماڭىزى بار قالالاردى دامىتۋ ماسەلەلەرى بويىنشا ۇكىمەتتىڭ تۇزەتۋلەرى ۇسىنىلادى. بۇل وزگەرىستەر مەملەكەت باسشىسىنىڭ تاپسىرماسىن ورىنداۋ ماقساتىمەن ازىرلەنگەن. زاڭ جوباسى 1 كودەكس پەن 6 زاڭعا وزگەرىستەر ەنگىزۋدى ۇسىنادى. بۇلار ەلوردا مەن رەسپۋبليكالىق ماڭىزى بار قالالاردى اباتتاندىرۋ ەرەجەلەرىن جەتىلدىرۋگە باعىتتالعان. اتاپ ايتقاندا, قولجەتىمدى ورتانى قامتاماسىز ەتۋ, ديزاين-كود ەنگىزۋ جانە ستاتسيونارلى ەمەس نىسانداردى ورنالاستىرۋ جانە ولاردىڭ قىزمەتىن رەتتەۋ. سونىمەن قاتار جارناما قىزمەتىن رەتتەۋ, قوعامدىق ورىنداردا كوشەدەگى اۋديوجارناماعا تىيىم سالۋ, تروتۋارلار مەن اۆتوجولداردا سىرتقى جارناما ورنالاستىرۋعا شەكتەۋ قويۋ, ەلورداداعى كوشى-قوندى رەتتەۋ تەتىكتەرىن جەتىلدىرۋ سياقتى جارناما ماسەلەلەرى قاراستىرىلعان.
ءبىرىنشى وقىلىمدا دەپۋتاتتار «جەر قويناۋى جانە جەر قويناۋىن پايدالانۋ تۋرالى» كودەكسكە سۋ رەسۋرستارىن قورعاۋ جانە پايدالانۋ ماسەلەلەرى بويىنشا ەنگىزىلەتىن وزگەرىستەردى دە تالقىلايدى. زاڭ جوباسى دەپۋتاتتاردىڭ باستاماسىمەن جاڭا سۋ كودەكسىنىڭ رەداكتسياسىمەن زاڭنامالىق اكتىنىڭ ەرەجەلەرىن ۇيلەستىرۋ ماقساتىمەن ازىرلەندى. دەپۋتاتتاردىڭ تۇزەتۋلەرى ەكى كودەكستە جەراستى سۋ رەسۋرستارىن رەتتەۋ جانە پايدالانۋ ماسەلەلەرىندە بىرىڭعاي تەرمينولوگيانى قولدانۋعا, كاسپي تەڭىزىنىڭ قازاقستاندىق سەكتورىندا كومىرسۋتەكتەردى بارلاۋ جانە ءوندىرۋ بويىنشا وپەراتسيالاردى جۇرگىزۋگە قويىلعان تىيىمدى الىپ تاستاۋعا, سونداي-اق ارال تەڭىزىنىڭ اۋماعىندا ەرەكشە ەكولوگيالىق مارتەبەنى ەسكەرە وتىرىپ, جەر قويناۋىن پايدالانۋ وپەراتسيالارىن جۇرگىزۋگە تىيىم سالۋعا قاتىستى.
ىلەسپە زاڭ جوباسى اياسىندا اكىمشىلىك قۇقىقبۇزۋشىلىق تۋرالى كودەكسكە وزگەرىستەر ەنگىزىلەدى. ولار زاڭسىز سۋ الۋعا, سۋ وبەكتىلەرىندە, سۋ قورعاۋ ايماقتارى مەن بەلدەۋلەرىندە زاڭسىز قۇرىلىس جۇرگىزۋگە, سۋ پايدالانۋ شارتتارى مەن رەجىمىن بۇزۋعا, سۋ وبەكتىلەرىنىڭ ارنالارىن جانە شەكارالارىن وزگەرتۋگە قاتىستى سانكتسيالاردى قاتاڭداتۋعا باعىتتالعان. سونداي-اق گيدروتەحنيكالىق قۇرىلىستارعا تەحنيكالىق تەكسەرۋدى ورىنداماعانى نەمەسە قاتە جۇرگىزگەنى, ولاردى قاۋىپسىزدىك دەكلاراتسياسىنسىز پايدالانعانى ءۇشىن جاۋاپكەرشىلىك ەنگىزىلەدى.
ەكىنشى وقىلىمدا ءماجىلىس تاۋارلاردىڭ شىعارىلعان ەلىن ايقىنداۋ ماسەلەلەرى بويىنشا تۇزەتۋلەردى قاراستىرادى. زاڭ جوباسى پرەزيدەنتتىڭ 2023 جىلعى قىركۇيەكتەگى قازاقستان حالقىنا جولداۋىن ىسكە اسىرۋ ءۇشىن پارلامەنت دەپۋتاتتارىنىڭ باستاماسىمەن ازىرلەنگەن. ولار جوعارى ۇلەستى وقشاۋلاۋدىڭ ءوندىرىس تسيكلىن قۇرۋدى كوزدەيدى. بۇل ءوز كەزەگىندە يمپورتتىق جەتكىزىلىمدەرگە تاۋەلدىلىكتى ازايتۋعا, زاماناۋي تەحنولوگيالار ترانسفەرتىنە جانە جاڭا ءوندىرىستى وقشاۋلاۋعا مۇمكىندىك بەرەدى. اتاپ ايتقاندا, قولدانىستاعى «ست-KZ» سەرتيفيكاتى مەن يندۋستريالىق سەرتيفيكاتتىڭ ورنىنا قازاقستاندىق تاۋارلاردىڭ بىرىڭعاي ءتىزىلىمىن قۇرۋ ۇسىنىلادى.
سونىمەن قاتار دەپۋتاتتار قىلمىستىق جولمەن الىنعان كىرىستەردى زاڭداستىرۋ (جىلىستاتۋ) جانە تەرروريزمدى قارجىلاندىرۋ تاۋەكەلدەرىن باعالاۋ حالىقارالىق ورتالىعىن قۇرۋ تۋرالى كەلىسىمدى راتيفيكاتسيالاۋ تۋرالى جاڭا زاڭ جوباسىن جۇمىسقا الادى.