مۇناي-گاز سالاسىنىڭ كورنەكتى قايراتكەرى, تەحنيكا عىلىمدارىنىڭ دوكتورى, ماڭعىستاۋداعى مۇناي مەن ەمدىك-مينەرالدى سۋ كەن ورىندارىن اشقان عالىم ولەگ سەرگەەۆيچ گەرشتانسكي قايتىس بولدى. بۇل تۋرالى قر ەنەرگەتيكا مينيسترلىگى مالىمدەدى, دەپ جازادى Egemen.kz.
ولەگ گەرشتانسكي 1978 جىلدان باستاپ ءومىرىنىڭ سوڭىنا دەيىن مۇناي-گاز سالاسىندا ءتۇرلى لاۋازىمداردا ەڭبەك ەتىپ, قازاقستاننىڭ ەنەرگەتيكالىق سەكتورىنا ايتارلىقتاي ۇلەس قوسقان.
عالىم قازاقستان مۇنايشى-گەولوگتار قوعامىنىڭ مۇشەسى, ەنەرگەتيكا مينيسترلىگىنىڭ جانىنداعى كومىرسۋتەك كەن ورىندارىن بارلاۋ جانە يگەرۋ جونىندەگى ورتالىق كوميسسياسىنىڭ مۇشەسى, سونداي-اق «KAZENERGY» قاۋىمداستىعىنىڭ عىلىمي-تەحنيكالىق كەڭەسىنىڭ قۇرامىندا بولعان. ول 100-دەن استام عىلىمي ماقالانىڭ, 82 ونەرتابىستىڭ جانە 5 مونوگرافيانىڭ اۆتورى.
ەڭبەك جولىنداعى جەتىستىكتەرى ءۇشىن و.گەرشتانسكي «قۇرمەت», «پاراسات» وردەندەرىمەن, «ەرەن ەڭبەگى ءۇشىن» مەدالىمەن ماراپاتتالدى. سونداي-اق, وعان «قازاقستاننىڭ ەڭبەك سىڭىرگەن گەولوگى», «مۇناي-گاز سالاسىنىڭ ەڭبەك سىڭىرگەن قايراتكەرى» اتاقتارى بەرىلگەن.
«ولەگ سەرگەەۆيچ جارقىن عۇمىر كەشتى, ءاردايىم بەلسەندى ازاماتتىق ۇستانىمدا بولدى, ونى تەرەڭ ادامگەرشىلىك قاسيەتتەرى, جوعارى كاسىبيلىگى جانە ءوز ىسىنە دەگەن ادالدىعى ەرەكشەلەندىردى. گەولوگتار مەن گەوفيزيكتەر قاۋىمداستىعى ءوزىنىڭ ەڭ قىمباتتى مۇشەلەرىنىڭ ءبىرىن – ەلىمىزدىڭ مۇنايشىلار ءداستۇرىن ساقتاۋشى ءارى قورعاۋشى تۇلعاسىن جوعالتتى», دەلىنگەن حابارلامادا.