استاناداعى «قازاق ەلىنە مىڭ العىس» مونۋمەنتى 2018 جىلى بوي كوتەردى. ساۋلەتتى نىساندى ەلوردانىڭ 20 جىلدىعىنا وراي قاراعاندى وبلىسى تارتۋ ەتكەن-ءدى. تاريحي-مادەني ماڭىزعا يە ەسكەرتكىشتىڭ اۆتورلارى – ساۋلەتشى سەرىك رۇستەمبەكوۆ پەن ءمۇسىنشى رەنات ابەنوۆ.
قازاقستان حالقى اسسامبلەياسىنىڭ باستاماسىمەن قويىلعان مونۋمەنت بيىكتىگى 14 مەترگە تارتادى. ونىڭ باستى ەلەمەنتى – قولىنا نان ۇستاپ تۇرعان ايەل ءمۇسىنى. تاريحقا كوز جۇگىرتسەك, 1930–1952 جىلدارى قازاق جەرىنە ءتۇرلى ەتنوس وكىلدەرى كۇشتەپ جەر اۋدارىلدى. قيلى كەزەڭدە ميلليونداعان ادامعا جاڭا ورتاعا بەيىمدەلۋ قيىنعا سوقتى. الايدا قازاق حالقى جاتسىنباي, قولىنداعى بارىمەن ءبولىسىپ, قامقورلىق جاساپ, ۇيىنە پانالاتتى. مونۋمەنتتەگى بەينە سول قازاق حالقىنىڭ كەڭپەيىلدىلىگىن, قوناقجايلىعىن جانە قيىن-قىستاۋ كەزەڭدە دەپورتاتسيالانعان وزگە ەتنوس وكىلدەرىنە كورسەتكەن جاناشىرلىعىن بىلدىرەدى. ال ەسكەرتكىشتىڭ نەگىزگى بولىگىندە شاڭىراق بەينەلەنگەن. بۇل – قازاقستان سان ەتنوستىڭ ورتاق شاڭىراعىنا اينالىپ, بۇگىندە ەل حالقى بەيبىتشىلىكتە, بىرلىكتە, ىنتىماقتاستىقتا ءومىر ءسۇرىپ جاتىر دەگەندى ايعاقتايدى. تومەنگى جاقتاۋىنا لاتىن تىلىندە «Qazaq eline myń alġys» دەپ جازىلعان.