«قازاق گازەتتەرى» سەرىكتەستىگىندە قازاق باسپاسوزىنە ەلەۋلى ەڭبەك ءسىڭىرىپ, زەينەت دەمالىسىنا شىققان بىرقاتار ازاماتقا قۇرمەت كورسەتىلدى. سونداي-اق جاڭا قىزمەتكە تاعايىندالىپ جاتقان جۋرناليستەرگە ء«سات ساپار» ايتىلدى. جيىندى باس ديرەكتور ديحان قامزابەك ۇلى جۇرگىزدى, دەپ حابارلايدى Egemen.kz.
ۇجىم باسشىسى قازاق جۋرناليستيكاسىنىڭ اعا بۋىن وكىلدەرى سامات مۇسا, تورەعالي تاشەن, جاڭابەك تويبازاروۆتى زەينەت دەمالىسىنا شىعۋىمەن قۇتتىقتادى.
«مەملەكەتىمىزدىڭ اقپاراتتىق ساياساتىن ءتيىمدى ناسيحاتتاۋعا, ەلدىك تۇعىردى بەكىتۋگە سۇبەلى ۇلەس قوستىڭىزدار. قوعامنىڭ تۇيتكىلدەرىن زەردەلەپ, كوكەيكەستى تاقىرىپتاردى قاۋزاعان ىزدەنىستەرىڭىزدىڭ ناتيجەسى بۇگىندە وتاندىق ءباسپاسوز تاريحىندا ەلەۋلى ورىن الادى. ىسكەرلىك قابىلەت پەن شىعارماشىلىقتاعى كاسىبيلىكتەرىڭىزدىڭ ارقاسىندا مەكەمەنىڭ وركەندەۋىنە بەلسەنە ۇلەس قوستىڭىزدار. «قازاق گازەتتەرى» ۇجىمىنىڭ اتىنان سىزدەرگە زور دەنساۋلىق, شاڭىراقتارىڭىزعا باق-بەرەكە, الداعى باستامالارىڭىزعا تابىس تىلەيمىز!», دەدى د. قامزابەك ۇلى.
سونىمەن قاتار ديحان قامزابەك ۇلى الماتى قالاسى باسىلىمدارىنىڭ باسشىسى سەرىك سارىبايعا, «Ana tili» گازەتىنىڭ ينتەرنەت-رەداكتسيا ءبولىمىنىڭ باسشىسى ماقسات مالىككە العىس ءبىلدىرىپ, ولداردىڭ جاڭا قىزمەتىنە ساتتىلىك تىلەدى.
جيىن سوڭىندا قۇرمەت يەلەرى ارناۋلى العىس حاتپەن ماراپاتتالدى.