بۇل تۋرالى قر ءماجىلىسىنىڭ دەپۋتاتى داۋلەت مۇقاەۆ ءوزىنىڭ الەۋمەتتىك جەلىدەگى پاراقشاسىندا مالىمدەدى, دەپ حابارلايدى Egemen.kz.
دەپۋتاتتىڭ ايتۋىنشا, ۆاگوندار قىتايدا قۇراستىرىلىپ جاتىر.
«استاناداعى LRT بيىل كۇزدە ىسكە قوسىلادى. 4 ۆاگون سىيىمدىلىعى 600 ادام بولسا, ونىڭ جىلدامدىعى 80 كم/ساعاتىنا بولماق», دەپ جازدى ول.
ال, City Transportation Systems مالىمەتىنە سۇيەنسەك, قىتايدىڭ تانشان قالاسىندا LRT العاشقى جىلجىمالى قۇرامدارىن قۇراستىرۋ جۇمىستارى جۇرگىزىلىپ جاتىر. 19 دانا جىلجىمالى قۇرامعا تاپسىرىس «CRRC Tangshan Co., Ltd» زاۋىتىندا ورنالاستىرىلدى.ۇزىندىعى 60 مەترلىك جىلجىمالى قۇرامدار GOA 4 دەڭگەيىندەگى اۆتوماتتاندىرىلعان باعدارلامالىق-اپپاراتتىق كەشەنمەن جابدىقتالادى, ول كەلەسى فۋنكتسيالاردى قامتاماسىز ەتەدى:
ەسىكتەردى اۆتوماتتى تۇردە اشۋ جانە جابۋ; توقتاۋ جانە جىلدامداتۋ; دەپوعا كىرۋ جانە شىعۋ; قۇرامداردىڭ جاعدايىن باقىلاۋ; پويىزدار اراسىنداعى قاشىقتىقتى رەتتەۋ; وپەراتوردىڭ (ماشينيس) قاتىسۋىنسىز باسقا فۋنكتسيالاردى ورىنداۋ.ءتورت سەكتسيالى قۇرامدار تولىق جۇكتەلگەندە (6 ادام/شارشى مەتر) 600-دەن استام جولاۋشىنى سىيدىرا الادى. سونىمەن قاتار سالونداردا بەرىكتىگى جوعارى ماتەريالدار, سونىڭ ىشىندە ورگانوسيليكاتتى بىلعارى جانە شىنى تالشىقتى كومپوزيت قولدانىلادى, بۇل جولاۋشىلارعا جايلىلىقتى ارتتىرماق.
«قازىرگى ۋاقىتتا اليۋميني قورىتپاسىنان جاسالعان كورپۋس ەلەمەنتتەرىن دايىنداۋ جانە دانەكەرلەۋ جۇمىستارى جۇرگىزىلىپ جاتىر. العاشقى جىلجىمالى قۇرامدار مامىر ايىنىڭ سوڭىنا دەيىن دايىن بولادى. قىركۇيەك ايىندا العاشقى پويىزدار جەتكىزىلگەننەن كەيىن تەستىلىك سىناقتار باستالادى», دەلىنگەن حابارلامادا.