جەڭىس شەرۋىنە دايىندىق

جەڭىس شەرۋى ادەتتەگىشە اسكەري قۇرام­داردىڭ ساپپەن ءجۇرۋى, اسكەري تەحنيكانىڭ كورسەتىلىمى جانە اۆياتسيانىڭ اۋەدە ۇشىپ ءوتۋى سەكىلدى ءۇش كەزەڭنەن تۇرماق. ۇلتتىق ۇلان قاتارىنان اسكەري قىزمەتشىلەردىڭ ەكى كولونناسى ساپ تۇزەپ وتەدى دەپ جوس­پارلانىپ وتىر. ونىڭ ءبىرىن كۇن سايىن ەلىمىزدىڭ قالالارىندا قوعامدىق ءتار­تىپ پەن قاۋىپسىزدىكتى قامتاماسىز ەتەتىن پاترۋلدىك-بەكەتتىك قىزمەتتىڭ اسكەري قىزمەتشىلەرى, ال ەكىنشى كولوننانى ارنايى ماقساتتاعى «بۇركىت» بولىمشەسىنىڭ اسكەري قىزمەتشىلەرى قۇرايدى. بۇل بولىمشە جۋىردا «UAE SWAT Challenge» حالىقارالىق جارىسىندا ۇزدىك وندىققا ەنگەنىن ايتا كەتەيىك.

سونىمەن قاتار شەرۋگە ۇلگىلى-كورسە­تىلىمدىك وركەستر مەن ءىس-شارانى ۇيىم­داستىرۋعا جاۋاپتى اسكەري قىزمەتشىلەر دە قاتىسپاق. ولاردىڭ قاتارىندا جۇرگى­زۋشىلەر, تەحنيكا جەتەكشىلەرى, مەديتسي­نالىق قامتاماسىز ەتۋ ماماندارى مەن ەكيپاج مۇشەلەرى بار.

جاياۋ اسكەردەن بولەك, ۇلتتىق ۇلاننىڭ 17 اسكەري تەحنيكاسى شەرۋگە قاتىسادى. ولاردىڭ ىشىندە «بارىس» 6ح6 جانە «Cobra II» كولىكتەرى بار. بۇل بروندى ماشينالار كەپىلگە الىنعانداردى بوساتۋ, ماڭىزدى نىساندار مەن كولىك كولوننالارىن قورعاۋ بويىنشا تاپسىرمالاردى ورىنداۋعا ارنالعان. ال «ۋرال ۆۆ» جانە «الان-2» تەحنيكالارى كۇزەتىلەتىن نىساندارعا شابۋىل جاسالعان جاعدايدا قولداۋ كورسەتۋ مەن قورعانىستى كۇشەيتۋ ءۇشىن قولدانىلادى. بۇل تەحنيكالاردىڭ شەرۋدەگى كورسەتىلىمى ۇلتتىق ۇلاننىڭ ەل ازاماتتارى مەن ۇلتتىق مۇددەلەردى قورعاۋعا دايىندىعىن ايقىن دالەلدەيدى.

بيىلعى شەرۋدىڭ بۇرىنعىلاردان ەرەكشەلىگى – ساپ تۇزەگەن كولوننالار سوعىس جىلدارىنداعى كيىم ۇلگىسىندە بولادى جانە العاش رەت ەلىمىزدىڭ اۋماعىندا قۇرىلعان اسكەري بولىمدەردىڭ جاۋىنگەرلىك تۋلارىن سالتاناتتى جاعدايدا الىپ وتەدى. بۇل – ەلدىڭ باتىرلىق تاريحىنا قۇرمەت كورسەتىپ, بىرلىگىن ايشىقتايتىن ماڭىزدى ءىس-شارا بولماق. شەرۋگە جالپى سانى 4,5 مىڭ ادام قاتىسادى دەپ كۇتىلىپ وتىر. سونداي-اق قارۋ-جاراق پەن اسكەري تەحنيكا كورمەسى ۇيىمداستىرىلادى. ەل تاريحىنداعى ماڭىزدى كۇن قارۋلى كۇشتەرىمىزدىڭ دە كەز كەلگەن جاۋدىڭ بەتىن تويتارۋعا ساقاداي ساي دايىن ەكەنىن ايگىلەمەك.