اباي وبلىسىندا جىل باسىنان بەرى ءۇش ادام قازاقستان رەسپۋبليكاسىنىڭ ازاماتتىعىنان ايىرىلدى. ولاردىڭ ءبارى جاۋاپقا تارتىلىپ, ەلدەن قۋىلدى, دەپ حابارلايدى Egemen.kz.
وبلىستىق پد مالىمەتىنشە, ولاردىڭ ءبىرى – بورودۋليحا اۋدانىنىڭ 24 جاستاعى تۇرعىنى. ول كوشى-قون زاڭناماسىنىڭ تالاپتارىن ورىنداماعانى ءۇشىن جاۋاپكەرشىلىككە تارتىلدى.
«ميگراتسيالىق قىزمەت جۇرگىزگەن تەكسەرىس بارىسىندا ونىڭ رەسەي فەدەراتسياسىنىڭ ازاماتتىعىن العانى, الايدا بەلگىلەنگەن مەرزىمدە قازاقستان رەسپۋبليكاسىنىڭ قۇجاتتارىن تاپسىرماعانى انىقتالدى. ناتيجەسىندە ونىڭ پاسپورتى مەن جەكە كۋالىگى تاركىلەنىپ, ازاماتتىعىنان ايىرىلعانى رەسمي تۇردە تىركەلدى. سونىمەن قاتار, ول اكىمشىلىك قۇقىق بۇزۋشىلىق تۋرالى كودەكستىڭ 496-بابىنىڭ 2-بولىگىنە سايكەس اكىمشىلىك جاۋاپكەرشىلىككە تارتىلىپ, ەلدەن شىعارىلدى», دەلىنگەن پد حابارلاماسىندا.
ەسكە سالامىز, قازاقستان رەسپۋبليكاسىندا قوس ازاماتتىققا تىيىم سالىنعان. شەتەل مەملەكەتىنىڭ ازاماتتىعىن العان تۇلعالار 30 كۇنتىزبەلىك كۇن ىشىندە ميگراتسيالىق قىزمەتكە حابار بەرىپ, قازاقستان رەسپۋبليكاسىنىڭ قۇجاتتارىن تاپسىرۋعا مىندەتتى. بۇل تالاپتى ورىنداماۋ اۋىر سالدارعا اكەلۋى مۇمكىن.