استانا. 19 ماۋسىم. قىزىلوردا قالاسىندا ون ەكى تۇرعىن ءۇيدىڭ قۇرىلىسى باستالدى. سالتاناتتى شاراعا وبلىس اكىمى قىرىمبەك كوشەرباەۆ پەن «بايتەرەك» ۇبح اكتسيونەرلىك قوعامىنىڭ باسقارما توراعاسى قۋاندىق بيشىمباەۆ قاتىسىپ, قۇرىلىستىڭ العاشقى ىرگەتاسىن قالادى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
جاڭا باسپانالار شۇعىلا ىقشام اۋدانى شۇكىروۆ كوشەسى بويىنان جانە «سپمك-70» تۇرعىن اۋدانىندا بوي كوتەرەدى. شۇكىروۆ كوشەسى بويىنداعى بەس قاباتتى 4 تۇرعىن ءۇيدىڭ قۇرىلىسىن وسى جىلى اياقتاۋ جوسپارلانۋدا. جالپى اۋدانى 13 500 شارشى مەتردى قۇرايتىن تۇرعىن ۇيدە 230 وتباسى قونىستاندىرىلماق. سونداي-اق, سپمك-70 تۇرعىن اۋدانىندا ءبىر 40 پاتەرلى, ءۇش 50 پاتەرلى جانە ءۇش 60 پاتەرلى تۇرعىن ءۇي قۇرىلىسى باستالدى. تۇرعىن ۇيلەردى 2015 جىلدىڭ جەلتوقسان ايىندا پايدالانۋعا بەرۋ جوسپارلانىپ وتىر. سونىمەن قاتار, «اراي» ىقشام اۋدانىندا بەس قاباتتى تۇرعىن ءۇيدىڭ قۇرىلىسى جۇرگىزىلۋدە. قازىر قۇرىلىس الاڭىندا 300 جۇمىسشى ەڭبەك ەتۋدە. 280 پاتەرلى تۇرعىن ءۇي قىركۇيەك ايىندا پايدالانۋعا بەرىلمەكشى. مۇنان سوڭ ايماق باسشىسى جەلتوقسان كوشەسىندە سالىنىپ جاتقان جالپى اۋدانى 4000 شارشى مەتردى قۇرايتىن 70 پاتەرلى تۇرعىن ءۇيدىڭ قۇرىلىسىمەن دە تانىستى.
ايتا كەتەيىك, وتكەن جىلى قىزىلوردا وبلىسىندا «قولجەتىمدى باسپانا» جانە «جۇمىسپەن قامتۋدىڭ جول كارتاسى» باعدارلامالارى اياسىندا 38 مىڭ شارشى مەتردى قۇرايتىن 466 پاتەردى پايدالانۋعا بەرىلگەن بولاتىن. ال بيىل جىل سوڭىنا دەيىن وبلىستا رەسپۋبليكالىق, جەرگىلىكتى بيۋدجەتتەردەن بولىنگەن قاراجاتتارعا جانە «قازاقستاننىڭ يپوتەكالىق كومپانياسى» يپوتەكالىق ۇيىمى اكتسيونەرلىك قوعامى جانە «سامۇرىق-قازىنا» جىلجىمايتىن م ۇلىك قورى ەسەبىنەن 180 مىڭنان استام شارشى مەتردى قۇرايتىن 2700 پاتەر پايدالانۋعا بەرىلەدى دەپ جوسپارلانۋدا. بۇل كورسەتكىش وتكەن جىلدارمەن سالىستىرعاندا 4 ەسەگە ارتىق.
تالعات رايىمبەك.
دەرەك, سۋرەت: وبلىس اكىمدىگىنىڭ ءباسپاسوز قىزمەتى.