قوستاناي وبلىسى پوليتسيا دەپارتامەنتىنىڭ جەدەل ۋاكىلدەرى مەن قىلمىستىق-اتقارۋ جۇيەسى دەپارتامەنتى قىزمەتكەرلەرى وتكەن جىلدارداعى اسا اۋىر قىلمىستى اشتى, دەپ حابارلايدى Egemen.kz Polisia.kz-كە سىلتەمە جاساپ.
ەستەرىڭىزگە سالا كەتەيىك, 2003 جىلدىڭ مامىر ايىندا قوستاناي قالاسىندا زورلىق-زومبىلىقپەن ولتىرىلگەن 21 جاستاعى جەرگىلىكتى تۇرعىننىڭ ءمايىتى تابىلعان. ساراپتاما ناتيجەسى ونى تۇنشىقتىرىپ ولتىرگەنىن كورسەتكەن. بۇل جاعداي بويىنشا قىلمىستىق ءىس قوزعالىپ, تەرگەۋ جۇمىستارى باستالعان ەدى.
العاشقىدا كۇدىكتىلەردىڭ ءبىرى انىقتالعانىمەن, ونىڭ كىسى ولتىرۋگە قاتىسى بارى تۋرالى جەتكىلىكتى دالەلدەر تابىلماعان. الايدا, پوليتسيا قىزمەتكەرلەرى 20 جىل بويى دالەلدەر جيناۋدى توقتاتپاي, تەرگەۋ جۇمىسىن جالعاستىرعان. اقپان ايىندا قوسىمشا تەرگەۋ شارالارى جۇرگىزىلىپ, ناتيجەسىندە 44 جاستاعى كۇدىكتى قولعا تۇسكەن.
«كۇدىكتى 2003 جىلدىڭ اقپان ايىندا مارقۇممەن تانىسقانىن جانە ەكەۋى بىرگە ىشىمدىك ىشكەنىن ايتتى. ونىڭ سوزىنشە, جابىرلەنۋشى جىنىستىق قاتىناسقا تۇسۋدەن باس تارتقان سوڭ, كۇدىكتى ونى تۇنشىقتىرىپ ولتىرگەن. قازىرگى ۋاقىتتا كۇدىكتى تەرگەۋ يزولياتورىنا قاماۋعا الىنىپ, قىلمىستىق ءىس سوتقا جولداندى», دەلىنگەن حابارلامادا.
ايتا كەتەيىك, قوستاناي وبلىسى پوليتسيا دەپارتامەنتى وتكەن جىلدارداعى اۋىر قىلمىستاردى اشۋ بويىنشا جۇمىستى جالعاستىرىپ, بيىل 44 اۋىر قىلمىستى اشقان.