اقتوبە. 18 ماۋسىم. اقتوبەدە وبلىستىق قازاقستان حالقى اسسامبلەياسى عيماراتىندا قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى جانە قازاقستان حالقى اسسامبلەياسىنىڭ قولداۋىمەن «مەملەكەتتىك ەتنوساياساتتى جۇزەگە اسىرۋداعى مەملەكەتتىك-قۇقىقتىق تەتىكتەر جانە حالىقارالىق ستاندارتتار» تاقىرىبىنداعى ءۇش كۇندىك رەسپۋبليكالىق سەمينار-ترەنينگ ءوز جۇمىسىن باستادى. بۇل تۋرالى egemen.kz ءتىلشىسى حابارلادى.
سەمينار-ترەنينگ جۇمىسىنا پرەزيدەنت اكىمشىلىگى قازاقستان حالقى اسسامبلەياسى حاتشىلىعىنىڭ, مادەنيەت جانە سپورت مينيسترلىگىنىڭ, قازاقستان رەسپۋبليكاسى پرەزيدەنتىنىڭ جانىنداعى «قوعامدىق كەلىسىم» رمم, ادام قۇقىقتارى جونىندەگى كوميسسيانىڭ وكىلدەرى, مەملەكەتتىك باسقارۋ اكادەمياسىنىڭ پروفەسسور-وقىتۋشىلار قۇرامى قاتىسۋدا.
تىڭداۋشىلار رەتىندە ەتنوسارالىق جانە كونفەسسياارالىق قاتىناستار, ەتنوساياسات ماسەلەسىمەن اينالىساتىن مەملەكەتتىك قىزمەتشىلەر, اكىمدىكتەر مەن ءماسليحاتتاردىڭ ماماندارى, ىشكى ساياسات بولىمدەرىنىڭ جانە ءدىن ىستەرى, جاستار ساياساتى باسقارمالارىنىڭ باسشىلارى مەن ماماندارى, وڭىرلەردىڭ قحا حاتشىلىقتارىنىڭ مەڭگەرۋشىلەرى مەن ماماندارى جانە عىلىمي-ساراپتامالىق توپتارىنىڭ مۇشەلەرى, «قوعامدىق كەلىسىم» رمم وڭىرلىك قۇرىلىمدارىنىڭ قىزمەتكەرلەرى, باق وكىلدەرى, اقتوبە, اتىراۋ, باتىس قازاقستان جانە ماڭعىستاۋ وبلىستارىنىڭ ەتنومادەني, ءدىني جانە جاستار بىرلەستىكتەرىنىڭ جەتەكشىلەرى قاتىسۋدا. سەمينار-ترەنينگتىڭ سالتاناتتى اشىلۋىندا قازاقستان حالقى اسسامبلەياسى وبلىستىق حاتشىلىعىنىڭ مەڭگەرۋشىسى جولداس نۇرشين ءسوز سويلەپ, قاتىسۋشىلارعا وسى ماسەلە بويىنشا بىلىمدەرىن جەتىلدىرۋ باعىتىندا ساتتىلىك تىلەدى. مەملەكەتتىك باسقارۋ اكادەمياسى ورتالىق ازيا وڭىرىندەگى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ جەتەكشىسى ايگۇل سادۆوكاسوۆا سەمينار-ترەنينگتىڭ جۇمىسىمەن تانىستىردى, ونىڭ ماڭىزى مەن ماقساتىنا توقتالدى.
ايماقتىق سەمينار-ترەنينگ شەڭبەرىندە «بەس ينستيتۋتسيونالدىق رەفورمانى ىسكە اسىرۋ جونىندەگى 100 ناقتى قادام: قوعامنىڭ ءبىر تەكتىلىگى مەن بىرلىگىن قامتاماسىز ەتۋ ماسەلەلەرى» تاقىرىبىندا دوڭگەلەك ۇستەل وتەدى, وندا «100 ناقتى قادام» ۇلت جوسپارى شەڭبەرىندە مەملەكەتتىك ەتنوساياساتتىڭ قازىرگى كەزەڭدەگى باسىمدىلىقتارى ايقىندالىپ, جاڭا مىندەتتەرى تالقىلانادى.
سەمينار-ترەنينگ جۇمىسى بارىسىندا ەتنوالەۋمەتتىك جانە ەتنوكونفەسسيونالدىق ۇدەرىستەردى ءتيىمدى باسقارۋدىڭ نورماتيۆتىك-قۇقىقتىق بازاسىنىڭ تەوريالىق جانە تاجىريبەلىك قۇرامداس بولىكتەرى قاراستىرىلادى, قۇقىقتىق مادەنيەت تولەرانتتىلىقتى قالىپتاستىرۋ بويىنشا ترەنينگتەر جۇرگىزىلەدى.
سونىمەن قاتار, «ماڭگىلىك ەل» يدەياسىنىڭ مادەني-فيلوسوفيالىق نەگىزدەرى جانە ۇلتتىق بىرلىك پەن قوعامدىق كەلىسىمدى قامتاماسىز ەتۋ تەتىكتەرى تالقىلانادى. ساباق بارىسىندا مەملەكەتتىك ەتنوساياساتتى جانە ەتنوسارالىق قاتىناستاردى قۇقىقتىق قامتاماسىز ەتۋ ماسەلەلەرى جونىندە جۇمىس تاجىريبەسىمەن ءبولىسۋ جانە پىكىر الماسۋ الاڭدارى جۇرگىزىلەدى.
ساتىبالدى ءساۋىرباي.
دەرەك, سۋرەت: egemen.kz.