1 ناۋرىز – كەمسىتۋشىلىككە قارسى كۇرەس كۇنى (Zero Discrimination Day). ول 2014 جىلدان باستاپ بۇۇ شەشىمىمەن جىل سايىن اتاپ وتىلەدى. وسىعان بايلانىستى شىمكەنت قالالىق جيتس-ءتىڭ الدىن الۋ جانە وعان قارسى كۇرەس جونىندەگى ورتالىق ماماندارى ارنايى ءىس-شارالار ۇيىمداستىردى. مۇنداعى ماقسات – ايتۆ-مەن ءومىر سۇرەتىن ادامداردىڭ ماسەلەلەرىنە نازار اۋدارۋ, كەمسىتۋشىلىككە جول بەرمەۋ, ونىڭ وسالدىعىنا اسەر ەتەتىن فاكتورلاردى جويۋ, ءار ادامنىڭ قادىر-قاسيەتىمەن تولىققاندى ءومىر ءسۇرۋ قۇقىعىن ەسكە سالۋ.
بۇۇ جانىندا ايتۆ, جيتس بويىنشا بىرىككەن باعدارلامانى ىسكە اسىراتىن ۇيىم بار, ول يۋنەيدس دەپ اتالادى. وسى ۇيىم 40 جىلدان استام ۋاقىت ىشىندە مەديتسينالىق قىزمەتتەرگە قول جەتكىزۋ جەڭىلدەگەنىنە قاراماستان, قوعام ستيگما (تاڭبا باسۋ), كەمسىتۋ, كريميناليزاتسيا, قارجىلاندىرۋدى قىسقارتۋ جانە ساياسي قىسىم سياقتى كوپتەگەن قيىندىقتارعا ءالى دە تاپ بولىپ وتىرعانىن مالىمدەيدى.
سوندىقتان كەمسىتۋشىلىككە قارسى كۇرەس كۇنىندە ۇيىم ۇكىمەتتەردى, دونورلاردى جانە سەرىكتەستەردى ءوز مىندەتتەمەلەرىن ورىنداۋعا جانە قوعامداستىقتارعا قولداۋ كورسەتۋگە شاقىرادى.
«ستيگما, ياعني اۋرۋ جۇقتىرعان ادامنىڭ كەمشىلىگىن بەتىنە شىركەۋ قىلىپ باسۋ – ايتۆ-ينفەكتسياسىنىڭ 4-ءشى ساتىسىنا ءوتۋ قاۋپىنىڭ وسۋىنە اكەلەدى. مەديتسينالىق كومەكپەن قامتاماسىز ەتۋ دەڭگەيىن, سونداي-اق بىلىمگە, جۇمىسقا ورنالاسۋ قولجەتىمدىلىگىن شەكتەيدى. سول سەبەپتى قوعام كەمسىتۋشىلىكتىڭ سالدارى اۋىر بولاتىنىنا نازار اۋدارۋى قاجەت», دەيدى شىمكەنت قالاسى جيتس ورتالىعىنىڭ باس دارىگەرى ب.سىربەك.
دارىگەردىڭ ايتۋىنشا ءار ادامنىڭ قۇقىعىن قورعاۋ – ورتاق مىندەت. كەمسىتۋشىلىكتى توقتاتۋعا ارقايسىمىزدىڭ كۇش-جىگەرىمىز بار. وسى ورايدا, جوعارىدا اتاپ وتكەنىمىزدەي, شىمكەنت قالاسىنىڭ جيتس-ءتىڭ الدىن الۋ جانە وعان قارسى كۇرەس ورتالىعى 1 ناۋرىز – كەمسىتۋشىلىك كۇنىنە بايلانىستى ءىس-شارالاردى قولعا الدى. ول ايتۆ-ينفەكتسياسى ماسەلەلەرى بويىنشا ءبىلىم دەڭگەيىن ارتتىرۋعا, اقپاراتتىق-تانىمدىق تۇسىنىكتى كەڭەيتۋگە باعىتتالعان.
ماماننىڭ مالىمدەۋىنشە قالاي بولعاندا دا ايتۆ-مەن ءومىر سۇرەتىن ادامدارعا قاتىستى كەمسىتۋشىلىككە جول بەرمەۋىمىز كەرەك. ادامنىڭ دەنساۋلىعى قالاي قورعالسا, ونىڭ ەركى مەن قۇقىعى دا سولاي قورعالۋى قاجەت.
شىمكەنت