اكادەميالىق ورتاق تاريحتى جازۋ ماسەلەسى 2024 جىلدىڭ 6 قاراشاسىندا بىشكەكتە وتكەن تۇركى مەملەكەتتەرى ۇيىمىنىڭ XI سامميتىندە كوتەرىلىپ, ەل باسشىلارى مۇنداي اۋقىمدى جوبانى جۇزەگە اسىرۋدى تۇركى اكادەمياسىنا تاپسىرعان ەدى.
24 اقپاندا انكارادا تۇركى ەلدەرىنىڭ تاريحىن جازۋ بويىنشا ورتاق اكادەميالىق جۇمىستى تالقىلاۋعا ارنالعان حالىقارالىق سەسسيا ءوتتى. وعان تۇركى مەملەكەتتەرى ۇيىمىنا مۇشە جانە باقىلاۋشى ەلدەردىڭ تاريح جانە ارحەولوگيا ينستيتۋتتارىنىڭ باسشىلارى, سونداي-اق جەتەكشى تاريحشىلار مەن ساراپشىلار قاتىستى. اتاپ ايتقاندا, تۇركى اكادەمياسىنىڭ پرەزيدەنتى شاھين مۇستافاەۆ, تۇركى مەملەكەتتەرى ۇيىمى اقساقالدار كەڭەسىنىڭ توراعاسى بينالي يىلدىرىم, اتاتۇرىك اتىنداعى جوعارى كەڭەس توراعاسى دەريا ءورس جانە تۇرىك تاريح قوعامىنىڭ پرەزيدەنتى يۋكسەل وزگەن جيىن بارىسىندا ءوز ويلارىن ورتاعا سالدى.
ءىس-شارانىڭ اشىلۋىندا ءسوز سويلەگەن تۇركى اكادەمياسىنىڭ باسشىسى شاھين مۇستافاەۆ جوبانى قولداعان بارلىق قاتىسۋشىعا العىس ايتىپ, بۇل باستامانىڭ تۇركى الەمىنىڭ عىلىمي ينتەگراتسياسى ءۇشىن ماڭىزدى ەكەنىن اتاپ ءوتتى. ء«بىر عانا مەملەكەتتىڭ تاريحىن جازۋ وڭاي شارۋا ەمەس. ال ءبىزدىڭ الدىمىزدا تۇتاس حالىقتار مەن مەملەكەتتەردىڭ ورتاق تاريحىن جۇيەلەۋ مىندەتى تۇر», دەدى ول.
الدىمەن ۇجىمدىق مونوگرافيانىڭ تۇجىرىمدامالىق نەگىزىن قالىپتاستىرۋدىڭ ماڭىزدىلىعىن اتاپ ءوتىپ, اكادەميالىق ەڭبەكتىڭ قاراپايىم وقىرمانعا, اسىرەسە ستۋدەنتتەر مەن جاس زەرتتەۋشىلەرگە تۇسىنىكتى بولۋى كەرەكتىگىن باسا ايتتى.
ۇجىمدىق مونوگرافيانىڭ باستى ماقساتى – تۇركى الەمى تاريحىنىڭ ماڭىزدى كەزەڭدەرىن زەرتتەپ, باۋىرلاس حالىقتاردىڭ ورتاق تاريحي ساناسىن قالىپتاستىرۋ, جاستاردىڭ ۇلتتىق ماقتانىش سەزىمىن نىعايتۋ جانە تۇركى وركەنيەتىنىڭ باي مۇراسىن حالىقارالىق دەڭگەيدە كەڭىنەن تانىتۋ. كەزدەسۋ قورىتىندىسى بويىنشا تۇركى اكادەمياسىنىڭ پرەزيدەنتى مەن تاريح جانە ارحەولوگيا ينستيتۋتتارىنىڭ باسشىلارى تۇركى ەلدەرىنىڭ تاريحىنا ارنالعان اكادەميالىق ەڭبەكتى بىرلەسىپ ازىرلەۋدى كوزدەيتىن ىنتىماقتاستىق حاتتاماسىنا قول قويدى.