ونەركاسىپ جانە قۇرىلىس ءمينيسترى قانات شارلاپاەۆتىڭ توراعالىعىمەن Maqsut Narikbayev University الاڭىندا جەر قويناۋىن پايدالانۋشى كومپانيالار وكىلدەرىنىڭ قاتىسۋىمەن دوڭگەلەك ۇستەل ۇيىمداستىرىلىپ, ونىڭ بارىسىندا گەولوگيا جانە جەر قويناۋىن پايدالانۋ سالاسىنىڭ نەگىزگى اسپەكتىلەرى تالقىلاندى, دەپ حابارلايدى Egemen.kz.
قانات شارلاپاەۆ ءوز سوزىندە گەولوگيالىق سالادا مينيسترلىكتىڭ مىندەتى – ەل ونەركاسىبىنىڭ بارلىق سالالارىن بەلسەندى دامىتۋ ءۇشىن مينەرالدىق-شيكىزات بازاسىن تولىقتىرۋ ماقساتىندا قازاقستان اۋماعىن زەرتتەۋدى ارتتىرۋ ەكەنىن ايتتى.
مينيستر وتكەن جىلدىڭ قورىتىندىسىمەن جانە اعىمداعى جىلدىڭ جوسپارىمەن ءبولىستى. گەولوگيالىق بارلاۋ جۇمىستارىن جانداندىرۋ جانە جاڭا كەن ورىندارىن اشۋ ماقساتىندا 2014-2018 جىلدار ارالىعىندا زاڭنامالىق رەفورما جۇرگىزىلىپ, اۆستراليا مەن كانادا مىسالىندا گەولوگيالىق بارلاۋ ۋچاسكەلەرىنە قول جەتكىزۋدىڭ قولدانۋ قاعيداتى بەكىتىلگەن «جەر قويناۋى جانە جەر قويناۋىن پايدالانۋ تۋرالى» كودەكس قابىلداندى.
پرەزيدەنتتىڭ تاپسىرماسى بويىنشا جەر قويناۋىن پايدالانۋدىڭ بىرىڭعاي پلاتفورماسى (minerals.e-qazyna.kz) ىسكە قوسىلدى.
ءىس-شارا بارىسىندا ۆيتسە-مينيستر ءجاننات ءدۇبىروۆا جەر قويناۋىن پايدالانۋ سالاسىن تسيفرلاندىرۋ جوبالارى تۋرالى ايتتى. اتاپ ايتقاندا, ىسكە قوسىلعان جەر قويناۋىن پايدالانۋدىڭ بىرىڭعاي پلاتفورماسى تۋرالى جەتكىزدى.
جەر قويناۋىن پايدالانۋدىڭ بىرىڭعاي پلاتفورماسى بارلىق گەولوگيالىق اقپاراتقا اشىق قول جەتكىزۋگە مۇمكىندىك بەرەدى. پلاتفورمادا 22 مەملەكەتتىك قىزمەت تسيفرلاندىرىلدى. ىسكە قوسىلعاننان بەرى 506 ءوتىنىم وڭدەلدى.
«جەر قويناۋىن پايدالانۋدىڭ بىرىڭعاي پلاتفورماسىنىڭ ارقاسىندا بارلاۋعا نەمەسە وندىرۋگە ءوتىنىم بەرۋدەن باستاپ ونىڭ اۋكتسيونىنا جانە ليتسەنزيانى بەرۋگە دەيىن ۇزدىكسىز پروتسەسس جۇزەگە اسىرىلدى», دەدى ۆيتسە-مينيستر.
پلاتفورمادا بارلىق گەولوگيالىق ەسەپتەردىڭ ءتىزىلىمى, العاشقى كىتاپتار, سونىڭ ىشىندە رەفەرات, ەسەپ مازمۇنى, گرافيكالىق قوسىمشالار ءتىزىمى, جۇمىس ناتيجەلەرى, قورىتىندىلار, تۇجىرىمدار, پايدالانىلعان ادەبيەتتەر ءتىزىمى, سونىمەن قاتار تەگىن ونلاين شولۋ جانە ورىندالعان جۇمىستاردى ءتۇسىنۋ ءۇشىن 60 000-نان استام ەسەپ بار.
مۇددەلى اۋماق تۋرالى قاجەتتى اقپاراتتى العاننان كەيىن پايدالانۋشىعا قولدانىستاعى ليتسەنزيالار مەن كەلىسىم-شارتتار, باسىپ الىنعان جانە بوس اۋماقتار, سونداي-اق اۋماقتا جۇرگىزىلگەن گەولوگيالىق-گەوفيزيكالىق بارلاۋ جۇمىستارى تۋرالى اقپارات بەرىلەدى.
ناقتى قاجەتتى گەولوگيالىق ماتەريالداردى ساتىپ الۋ ءۇشىن جەر قويناۋىن پايدالانۋشىلار ۇلتتىق گەولوگيالىق قىزمەتتىڭ ينتەرنەت-رەسۋرسىندا ءوتىنىم بەرەدى, ول 5 جۇمىس كۇنىنەن كەشىكتىرمەي وڭدەلەدى.
بىرىڭعاي مەملەكەتتىك قىزمەتتىڭ ينتەراكتيۆتى كارتاسىن بولەك اتاپ وتكەن ءجون. ونىڭ ارقاسىندا الەۋەتتى جەر قويناۋىن پايدالانۋشىلار ينفراقۇرىلىمنان باستاپ گەولوگيالىق-گەوفيزيكالىق ەسەپتەرگە دەيىن سۇرالعان اۋماقتىڭ تولىق بەينەسىن الادى.
ينتەراكتيۆتى كارتا جەر قويناۋىن پايدالانۋ ءۇشىن الىپ جاتقان بارلىق اۋماقتاردى قامتيدى, سونداي-اق اۋكتسيونعا قولجەتىمدى اۋماقتاردى ورنالاستىرۋعا مۇمكىندىك بەرەدى. ەندى ينۆەستورلار دەلدالسىز پورتالعا تىكەلەي كىرىپ, قالاعان سايتتى تاڭداپ, اۋكتسيونعا قاتىسۋعا ءوتىنىم بەرە الادى.
ج.دۋبيروۆا تيىمدىلىك پەن اشىقتىقتى ارتتىرۋ ماقساتىندا قاتتى پايدالى قازبالار بويىنشا بەرىلگەن ليتسەنزيالار مەن كەلىسىم-شارتتار بويىنشا مىندەتتەمەلەردىڭ ورىندالۋىن باقىلاۋ ۇدەرىسى تسيفرلاندىرىلعانىن اتاپ ءوتتى. بۇرىن بۇل باقىلاۋ قولمەن جۇزەگە اسىرىلاتىن. اعىمداعى جىلدىڭ ءساۋىر ايىنا دەيىن بىرىڭعاي قوعامدىق جەلىدە ليتسەنزيالاۋ جانە شارتتىق تالاپتاردى ەنگىزۋ جوسپارلانۋدا. شارتتاردى تەكسەرۋ جانە بارلىق ءوزارا ءىس-قيمىلدار ەلەكتروندى فورماتتا اۆتوماتتى تۇردە جۇزەگە اسىرىلادى.
ودان كەيىن دوڭگەلەك ۇستەل سۇراق-جاۋاپ فورماتىندا ءوتتى. دوڭگەلەك ۇستەلگە «رەسپۋبليكالىق تاۋ-كەن جانە تاۋ-كەن مەتاللۋرگيالىق كاسىپورىندار قاۋىمداستىعى» زتب, «قازاقمىس كورپوراتسياسى» جشس, «Qaragandy Power Silicon» جشس, «باعالى مەتالدار وندىرۋشىلەر قاۋىمداستىعى» زتب, «قازاقستان تاۋ-كەن پالاتاسى» زتب, «ەر-تاي» جشس, «ەۆرازيسكايا گرۋپپا» جشس, «ۇلتتىق گەولوگيالىق قىزمەت», «Qarmet» اق, «اك «التىنالماس» اق, «اسسوتسياتسيا KAZRC», «Caravan Resources LTD» جشس, «TENIR LOGISTIC» جشس, «Chu lli Resourses Ltd» جك, قازاقستاننىڭ ساۋدا-ونەركاسىپ پالاتاسى, «ناك «كازاتومپروم» اق, «ERG», «Solidcore Eurasia» جشس, «تاۋ-كەن كازاحستان» تكمك, «Kazzinc Holdings» جشس وكىلدەرى, ساراپشىلارى مەن باسشىلارى قاتىستى.
قاتىسۋشىلار باستاپقى گەولوگيالىق ەسەپتەردى تسيفرلاندىرۋ جانە ولاردىڭ جەر قويناۋىن پايدالانۋشىلار ءۇشىن قولجەتىمدىلىگى ماسەلەلەرىن, سونداي-اق پلاتفورمانى كاسىپورىنداردىڭ جۇمىسىنا بىرىكتىرۋ قاجەتتىلىگىن تالقىلادى.