زاۋىتتىڭ جاس وتاۋى

اۋەلى زاۋىتتىڭ كادر بولى­مى­نە ديليارا تالعاتقىزى جۇمىسقا ور­نالاسىپتى. ءىس قۇجاتىنا مىعىم جۇدىرىقتاي قىز وزىنە تاپ­سىرىلعان شارۋانى شيراتىپ اكەتەدى. بوس جۇمىس ورىندار جارمەڭكەسىنە ۇزبەي بارىپ, زاۋىتقا جۇمىسشى مامانداردى جينايدى. ءسويتىپ جۇرگەندە ميراس قانات ۇلى ءالى اشىلا قويماعان زاۋىتقا قۇجاتىن وتكىزىپتى. سودان العاش­قىلاردىڭ ءبىرى بولىپ تاشكەنت­تەگى تۇرمىستىق تەحنيكا شىعا­راتىن جەتى بىردەي زاۋىتتا تاعى­لىم­دامادان ءوتىپ, تاجىري­بە­سىن جەتىلدىرەدى.

ميراس – قاراعاندى زەرتتەۋ ۋنيۆەرسيتەتى حيميا فاكۋل­تە­تىنىڭ ۇزدىك تۇلەگى. وقۋىن ويداعىداي بىتىرگەن سوڭ وتان الدىنداعى بورىشىن وتەۋگە اتتاندى. اسكەري ساپتا ءجۇرىپ تە ءوزىن جان-جاقتى كورسەتە بىلگەن سارباز ءتۇرلى وقۋ-جاتتىعۋ جيى­نىندا وزىق بولدى. سودان سوڭ «AlsKazlab» سىناق زەرتحاناسىنا حيميك بولىپ ورنالاستى. ونداعى مىندەتىن دە ءمىنسىز اتقاردى. تاعى دا ءوزى ءبىلىم العان ۋنيۆەرسيتەتكە زاڭگەر ماماندىعىنا قوسىمشا وقۋعا تۇسەدى. قۇقىق قورعاۋ سالاسىندا دا ەڭبەك ەتەدى. ءسويتىپ ءجۇرىپ كەلىنشەگى ديليارا ەكەۋى كەڭەسىپ, جاڭا زاۋىتتان جارقىن بولاشاق ىزدەيدى. قازىر ول كاسىپورىننىڭ بىلدەي ءبىر جاۋاپتى مامانى.

ميراستىڭ قاي ءىستى بولسىن دومالاتىپ اكەتەتىن قابىلەتى بار. سونىڭ ارقاسىندا از ۋاقىت ىشىندە وعان ءاسۇي پەشىن قۇراس­تى­راتىن تسەحتى باسقارۋدى سە­نىپ تاپسىرادى. قازىر ونىڭ تسەحىندا 25 جۇمىسكەر بار. ءاسۇي پەشىنىڭ «Artel», «Shivaki», «Arg», «Apetito» برەندىمەن 62 ءتۇرىن قۇراستىرادى. كۇنىنە 350-400 پەش ازىرلەيدى. ولاردى تولىق قۇراستىرىپ, تەحنيكالىق تەكسەرىستەن ءجىتى وتكىزىپ, ەش كەدەرگىسىز جۇمىس ىستەيتىنىنە كوز جەتكىزىپ, قاپتاپ, قۇجاتىن سايكەستەندىرىپ, قوي­ماعا جونەلتەدى. ءوندىرىستىڭ ەڭ ۇلكەن بولىگىنە جاۋاپتى مامان جۇمىسشىلارىنىڭ شارۋا­سىن ۇيىمداستىرىپ, جاڭا­دان كەلگەن قىزمەتكەرلەردى وقى­تىپ, قاۋىپسىزدىك شارالارىن قاداعالايدى. «باستىسى, ءونىمنىڭ ساپاسى مەن كۇندەلىكتى جوسپاردى ورىنداۋ», دەيدى ول.

كەلىنشەگى ديليارا دا زاۋىت­تىڭ وتىمەن كىرىپ, ك ۇلىمەن شىعاتىن بىلىكتى كادردىڭ ءبىرى. بۇگىندە ەڭبەگى ەلەنىپ, كاسىپورىن اكىمشىلىگىنىڭ جاۋاپتى مامانى بولىپ تاعايىندالدى. سەرىك­تەس­تىكتىڭ قوعام جانە مەم­لە­كەتتىك مەكەمەلەرمەن بايلانىس باسقارماسىنا جەتەكشى بولعان ديليارا تالعاتقىزىنىڭ موينىنداعى جاۋاپكەرشىلىك وراسان. سىرتتان كەلگەن مەيمانداردى قارسى الىپ, زا­ۋىت تىرشىلىگىمەن تانىستىرۋدان باسقا, ىسكەرلىك قاعاز, قۇجات­تارمەن دامىل تاپپايدى.

ء«بىز وسى زاۋىت اشىلماس بۇرىن وتاۋ قۇرعانبىز. ەڭبەك ەتىپ جۇرگەن زاۋىتىمىزدىڭ ءوندىرىسى دە وركەن جايىپ, قانا­تى قاتايىپ كەلەدى. كۇيەۋىم زاۋىت­تاعى وزات جۇمىسشىنىڭ ءبىرى. زاۋىتپەن قاتار قانات جا­يىپ كەلەمىز. وسى جەردە ءجۇرىپ, جاڭا باسپاناعا قول جەتكىزدىك, جاڭا كولىك الدىق. باسشىلىق ەڭبەگىمىزدى ەلەپ, قىزمەتىمىزدى دە جوعارىلاتىپ جاتىر. ەكى قىزىمىز بار. ولاردىڭ دا وقۋ ۇلگەرىمى جاقسى. تاۋبە دەيمىز, بارلىعى ەڭبەكتىڭ ارقاسى. باستىسى, كۇيەۋىم ەكەۋمىز ۇيدە دە, جۇمىستا دا بىرگەمىز», دەيدى ديليارا.

جۇبايلار بوس ۋاقىتتارىن ءتيىمدى وتكىزەدى. ءۇيىنىڭ جا­نىن­­داعى سپورتتىق كەشەندە بىرگە جاتتىعادى. كۇندە­لىك­تى شاحمات ويناپ, ويلارىن شىنىق­تى­رادى. جاس وتاۋ جا­قىن­دا جاڭا شاڭىراققا قونىس اۋداردى. وتاندىق ءونىمدى قولداپ, پاتەرلەرىنە وزدەرى ەڭبەك ەتىپ جۇرگەن «Silk Road Electronics» كاسىپورنىنان ەلەكتر تاۋارلارىن ساتىپ الدى. «Artel» برەن­دى­مەن تەلەديدار, ەلەكترلى سۋ جىلىتقىش, شاڭسورعىش, ءاسۇي توق­پەشى, اۋاسورعىش, كىر جۋاتىن ماشينا, جەلدەتكىش سەكىلدى تۇر­مىستىق تەحنيكا تۇرلەرىن قول­دانىپ وتىر.

– زاۋىت وتباسىمىز ءۇشىن بەرەكەلى بولدى. كا­سىپورىن­نىڭ كەلەشەگى زور. بۇ­گىندە الەمدىك نارىققا شىقتى. جۇ­مىس­شىلارعا بارلىق جاع­داي­­دى قاراستىرعان. جوعارى جالاقى, ءۇي مەن جۇمىس اراسىندا اۆتوبۋسپەن تاسىمالداۋ, تەگىن تۇسكى اس, تولىق الەۋمەتتىك پاكەت ۇسىنادى. تاجىريبە تولىق­تىرىپ, ءبىلىم ارتتىرامىن دەگەن­دەردى ارنايى وقىتادى. وندا دا كۇنبە-كۇن جالاقىسى ءجۇرىپ جاتادى. زاۋىتتا ءالى دە بوس جۇ­مىس ورىندارى بار, – دەيدى م.قانات ۇلى.

قاراعاندى وبلىسى