2025 جىلعى 1 قاڭتاردان باستاپ قازاقستاندا مەديتسينالىق ۇيىمدار مەديتسينالىق-الەۋمەتتىك ساراپتاماعا سىرتتاي پرواكتيۆتى فورماتتا جىبەرەتىن ازاماتتاردى كۋالاندىرۋ جونىندەگى تاۋەلسىز ساراپشىلار ينستيتۋتى ەنگىزىلدى, دەپ حابارلايدى Egemen.kz.
ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاۋىنشا, تاۋەلسىز ساراپشىلار ينستيتۋتىن ەنگىزۋ دەنساۋلىق ساقتاۋ ۇيىمدارىنىڭ بەيىندى ماماندارىن مەديتسينالىق-الەۋمەتتىك ساراپتاماعا تارتۋعا مۇمكىندىك بەرەدى. سونداي-اق ءماس قىزمەتىن كادرلارمەن قامتاماسىز ەتۋ ماسەلەلەرىن شەشۋگە ىقپال ەتەدى, سىبايلاس جەمقورلىق قۇقىق بۇزۋشىلىق تاۋەكەلدەرىن ازايتادى جانە مۇگەدەكتىكتى بەلگىلەۋ بويىنشا مەملەكەتتىك قىزمەت كورسەتۋ ساپاسىن ارتتىرادى.
«وسى ينستيتۋتتى ءتيىمدى ەنگىزۋ ماقساتىندا 2024 جىلعى قىركۇيەكتەن جەلتوقسانعا دەيىن پيلوتتىق رەجيمدە مەديتسينالىق-الەۋمەتتىك ساراپتاماعا تاۋەلسىز ساراپشىلاردى تارتۋ تەتىگى سىنالدى. پيلوتتىق جوباعا 18 دارىگەر قاتىسىپ, ءماس-ءتىڭ 7 532 اكتىسى قارالدى. پيلوتتىق جوبانىڭ ناتيجەلەرى بويىنشا قولدانىستاعى نورماتيۆتىك قۇقىقتىق اكتىلەرگە وزگەرىستەر مەن تولىقتىرۋلار ەنگىزىلدى», دەلىنگەن حابارلامادا.
قازىرگى تاڭدا قر ەڭبەك جانە حالىقتى الەۋمەتتىك قورعاۋ مينيسترلىگىنىڭ الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتى مەديتسينالىق-الەۋمەتتىك ساراپتامانىڭ تاۋەلسىز ساراپشىلارىنىڭ تىزىلىمىنە ەنگىزۋ ءۇشىن ۇمىتكەرلەردىڭ قۇجاتتارىن قابىلداپ جاتىر. وتىنىشتەر الەۋمەتتىك قىزمەتتەر پورتالى (aleumet.egov.kz) ارقىلى بەرىلەدى, بۇل رەتتە ۇمىتكەرلەر دەربەس دەرەكتەردى جيناۋعا جانە وڭدەۋگە كەلىسىم بەرەدى.
بۇعان دەيىن حابارلاعانداي, بۇگىندە سىرتتاي كۋالاندىرۋ 30 نوزولوگيالىق نىسان بويىنشا جۇرگىزىلەدى. 2025 جىلدىڭ باسىنان بەرى وسى فورماتتا قازاقستاننىڭ بارلىق وڭىرلەرىنەن ءماس-كە تۇسكەن 8,5 مىڭنان استام ءوتىنىم قارالعان.