16-17 اقپان كۇندەرى ماڭعىستاۋ وبلىسى اكىمىنىڭ ورىنباسارى تىلەك جەتكىزگەن ۇلى يران يسلام رەسپۋبليكاسىنىڭ استاناسى تەگەران قالاسىندا قر ساۋدا جانە ينتەگراتسيا ءمينيسترى ارمان شاققاليەۆ پەن يران مەملەكەتىنىڭ اۋىل شارۋاشىلىعى ءمينيسترى عولامرەزا نۋري گەزەلجەنىڭ توراعالىعىمەن ۇيىمداستىرىلعان بيزنەس فورۋمعا قاتىستى, دەپ حابارلايدى قوعامدىق كوممۋنيكاتسيا ورتالىعى ماڭعىستاۋ وبلىستىق كاسىپكەرلىك جانە ساۋدا باسقارماسىنىڭ ءباسپاسوز قىزمەتىنە سىلتەمە جاساپ.
اتالعان بيزنەس-فورۋمعا 50-دەن استام قازاقستاندىق كاسىپكەر مەن 230 يراندىق بيزنەس وكىلدەرى قاتىستى. فورۋمنىڭ باستى ماقساتى - ءوزارا ءتيىمدى ىنتىماقتاستىقتىڭ الەۋەتىن جانە ەكى ەل اراسىنداعى ساۋدا-ەكونوميكالىق بايلانىستاردى ودان ءارى دامىتۋ بولدى.ەكى جاقتى كەزدەسۋ بارىسىندا B2B فورماتىندا, سونداي-اق كەلىسىمگە قول قويۋ ءراسىمى ءوتتى.
ايتا كەتەيىك, 2024 جىلدىڭ قاڭتار-قاراشا ايلارىندا ماڭعىستاۋ وبلىسى مەن يران يسلام رەسپۋبليكاسىنىڭ اراسىنداعى سىرتقى ساۋدا -ساتتىق اينالىمى 42,8 ملن اقش دوللارىن قۇرادى, ونىڭ ىشىندە: ەكسپورت – 6,1 ملن اقش دوللارىن, يمپورت – 36,7 ملن اقش دوللارىن قۇرادى.
ماڭعىستاۋ وبلىسى مەن يران يسلام رەسپۋبليكاسىنىڭ اراسىندا سىرتقى ساۋدا اينالىمىن نىعايتۋ, ەكسپورتتىق الەۋەتى مەن ءوڭىردىڭ لوگيستيكالىق مۇمكىندىكتەرىن ودان ءارى دامىتۋ ماقساتىندا قازاقستان رەسپۋبليكاسىنىڭ ساۋدا جانە ينتەگراتسيا ءمينيسترى ارمان شاققاليەۆتىڭ قاتىسۋىمەن يراندىق بيزنەس وكىلدەرىمەن كەزدەسۋ ءوتىپ, بىرقاتار مەموراندۋمدارعا قول قويىلدى. مەموراندۋمدار اياسىندا وڭدەۋ ونەركاسىبى, جاڭا وندىرىستەردى دامىتۋ, اۋىل شارۋاشىلىعى ونىمدەرىن ءوندىرۋ جانە تەڭىز پورتتارىنىڭ الەۋەتىن ۇلعايتۋ باعىتتارى قاراستىرىلدى.
اتالعان كەزدەسۋگە, مينيسترمەن بىرگە, قازاقستان رەسپۋبليكاسىنىڭ يران يسلام رەسپۋبليكاسىنداعى ەلشىسى وڭتالاپ وڭالباەۆ جانە «QazTrade» ساۋدا ساياساتىن دامىتۋ ورتالىعى» اق باس ديرەكتورى ايتمۇحامەد الداجاروۆ قاتىستى.
سونداي-اق, فورۋم اياسىندا تىلەك جەتكىزگەن ۇلى مەن قر ساۋدا جانە ينتەگراتسيا ءمينيسترى ارمان شاققاليەۆ يراندىق كاسىپورىنداردىڭ قىزمەتىمەن تانىستى.