بۇل تۋرالى دەپۋتات نارتاي سارسەنعاليەۆ ءماجىلىستىڭ جالپى وتىرىسىندا ايتتى, دەپ حابارلايدى Egemen.kz.
«2023 جىلى مەن ەستۋ قابىلەتى بۇزىلعان بالالاردى مەملەكەتتىك قولداۋمەن قامتاماسىز ەتۋ ماسەلەسىن كوتەردىم. اتاپ ايتقاندا, بۇل ميكروتيا جانە ەستۋ مۇشەلەرىنىڭ اترەزياسى بار بالالارعا قاتىستى بولدى. وكىنىشكە قاراي, ءبىزدىڭ ەلدە مۇنداي بالالاردىڭ كوپشىلىگىنە مۇگەدەكتىك بەرىلمەيدى», دەدى دەپۋتات.
نارتاي ارالباي ۇلىنىڭ ايتۋىنشا, ءتورتىنشى دارەجەلى كەرەڭدىك دياگنوزى قويىلعان بالالارعا عانا مۇگەدەكتىك الادى جانە ولارعا مەملەكەت ەسەبىنەن ەستۋ پروتەزدەرى بەرىلەدى, ولار ءار 5 جىل سايىن اۋىستىرىلادى. ال قالعان ءۇش ساناتتاعى ەستۋ قابىلەتى بۇزىلعان بالالار كومەكسىز قالىپ وتىر, دەپۋتاتتار ماسەلەنى بىرنەشە رەت تالقىلاپ, دوڭگەلەك ۇستەلدەر وتكىزگەن, سونداي-اق ەستۋ اپپاراتتارىن ساتىپ الۋ ءۇشىن نەسيە الۋعا ءماجبۇر بولعان اتا-انالارمەن بىرنەشە رەت كەزدەسكەن. بۇعان قوسا, مۇنداي بالالار ءجيى بۋللينگكە ۇشىرايدى, كەيبىرى مەكتەپكە بارۋدان دا باس تارتقان جاعدايلار بولىپتى.
«وسى ماسەلە بويىنشا ەكى جىل بويى جۇمىس ىستەدىك جانە, اقىرى, ميكروتيا جانە اترەزيا دياگنوزىمەن تۋعان بالالار مەن ەرەسەكتەردى جەرگىلىكتى بيۋدجەت ەسەبىنەن ەستۋ اپپاراتتارىمەن قامتاماسىز ەتۋ تۋرالى نورمانى ەنگىزدىك. بۇل – ۇلكەن قادام, ويتكەنى ەستۋ اپپاراتتارىنىڭ باعاسى ارزان ەمەس: ەڭ تومەنگى قۇنى – 500 مىڭ تەڭگەدەن باستالىپ, 5 ميلليون تەڭگەگە دەيىن جەتەدى», دەدى ول.
ايتا كەتەيىك, قابىلدانعان تۇزەتۋلەرگە سايكەس, جەرگىلىكتى اتقارۋشى ورگاندار ەستۋ قابىلەتى بۇزىلعان بارلىق ساناتتاعى بالالار مەن ەرەسەكتەردى ەستۋ اپپاراتتارىمەن قامتاماسىز ەتۋ ءۇشىن قاراجات بولۋلەرى ءتيىس. سونىمەن قاتار ولار بۇل اپپاراتتاردى ۋاقىتىلى ساتىپ الىپ, ءار 5 جىل سايىن جاڭارتىپ وتىرۋعا مىندەتتى.