جاستار اراسىندا سالاۋاتتى ءومىر سالتىن ناسيحاتتاپ, ولاردى ەسىرتكىنى قولدانۋ مەن تاراتۋدان تىياتىن كورنەكى ۇگىتتى ۇدايى جۇرگىزەتىن وبلىستىق پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسى بۇل جولى وقۋ ورىندارى اراسىندا ەسىرتكىگە قارسى ۇزدىك كورمە بايقاۋىن ۇيىمداستىردى.
كورمەدە ەسىرتكىگە قارسى سۋرەتتەر, پلاكاتتار, قولونەر بۇيىمدارى, ۇگىت پاراقتارى, پاراقشالار مەن بۋكلەتتەر, كىتاپتار, بروشيۋرالار مەن باننەرلەر كورسەتىلدى. قاتىسۋشىلار وسى ارقىلى دەنساۋلىقتى جاستاي كۇتىپ, سالاۋاتتى ءومىر سالتىن ۇستانۋعا شاقىردى.
سۋرەتتەر مەن قولونەر بۇيىمدارى جاستاردىڭ شىعارماشىلىق قابىلەتتەرىن دامىتىپ, جارقىن ومىرگە قىزىعۋشىلىعىن ارتتىرۋعا ىقپال ەتسە, ال ۇسىنىلعان كىتاپتار مەن بروشيۋرالار, ۇگىت-ناسيحات پاراقتارى, ەسىرتكىنى قولدانۋ مەن تاراتۋدىڭ جاعىمسىز سالدارى تۋرالى بايان ەتەدى.
كوميسسيا شەشىمىنە سايكەس ون قاتىسۋشى ۇزدىك دەپ تانىلدى. جاڭاقورعان اۋدانىنداعى №289, شيەلىدەگى №50, قازالى اۋدانىنداعى №226, ارال اۋدانىنداعى №292 ورتا مەكتەپتەر مەن م.مامەتوۆا اتىنداعى قىزىلوردا پەداگوگيكالىق جوعارى كوللەدجى جەڭىمپازدار قاتارىنان تابىلدى.