ەلىمىزدىڭ مادەنيەتى مەن ونەرىنە ەرەكشە ۇلەس قوسقان ديكتور, قازاقستاننىڭ ەڭبەك سىڭىرگەن ءارتىسى ساۋىق جاقانوۆانىڭ 80 جاسقا تولعان مەرەيتويىنا وراي الماتىداعى ۇلتتىق كىتاپحانادا «ساحارا ساندۋعاشى» اتتى كىتاپتىڭ تانىستىرىلىمى ءوتتى.
دارا داۋسىمەن قازاقتىڭ دالاسىن تەربەگەن كوركەمسوز ونەرىنىڭ ۇستاسى, ەسىمى ەلگە بەلگىلى ديكتوردىڭ مەرەيتويى قارساڭىندا جارىق كورىپ وتىرعان «ساحارا ساندۋعاشى» اتتى ىرگەلى جيناق ساۋىق ماسىعۇتقىزىنىڭ ءومىر جولى, قازاق راديوسىنداعى قىزمەتى, ۇستازدىق ەڭبەگى تۋرالى سىر شەرتەدى. سىڭعىرلاعان جاعىمدى داۋسى تىڭدارمانىنىڭ قۇلاعىندا دا, جۇرەگىندە دە ساقتاۋلى تۇرعان ساۋىق ماسىعۇتقىزى راديو حابارلارعا وزگەشە ءوڭ بەرىپ, قازاق راديوسىنىڭ تاريحىندا وشپەس ءىز قالدىرىپ, ونىڭ دامۋى مەن وركەندەۋى ءۇشىن لايىقتى ەڭبەك ءسىڭىردى. ول تۋرالى ءان پاديشاسى روزا باعلانوۆا: «ساۋىق جاقانوۆانى جاقسى كورەمىن. ماعان ونىڭ ءسوزدى بۇزباي مانىنە كەلتىرىپ ايتاتىنى, جاقسىلىق نەمەسە جامانشىلىق بولىپ جاتسا, ونى دا ادامنىڭ كوكەيىنە جەتەرلىكتەي زەردەلەپ, اسەرلى جەتكىزەتىنى ۇنايدى. ءارى ايتىپ تۇرعان تاقىرىبىنا ساي مازمۇنىن ءدال بەرەدى. مەن ونىڭ تالانتىن جوعارى باعالايمىن», دەگەن ەكەن.
اتالعان جيناق بەلگىلى رۋحانيات جاناشىرى, باسپاگەر راقىمعالي قۇل-مۇحاممەدتىڭ تىكەلەي قولداۋىمەن «اتامۇرا» باسپاسىنان جارىق كورىپ وتىر. كىتاپتىڭ قۇراستىرۋشىلارى – اقپارات سالاسىنىڭ ۇزدىگى, بەلگىلى جۋرناليست تاڭسۇلۋ الدابەرگەنقىزى مەن جۋرناليستەر وداعىنىڭ مۇشەسى, راديوجۋرناليست جازيرا امانتايقىزى.
«قازاق ديكتورلارىنىڭ اتاسى انۋاربەك بايجانباەۆ ساۋىق جاقانوۆانى «ەفيردىڭ اقبايانى» اتاعان. بىراق اپاي «الدىمدا داۋىلپاز ديكتور انۋاربەك اعالارىم بار. ول كىسىلەردەن بۇرىن قالاي كىتاپ شىعارامىن؟» دەپ ەستىگەن بەتتە ات-تونىن الا قاشتى. دەسە دە, بار سانالى عۇمىرىن راديو قىزمەتىنە ارناعان, بىرنەشە بۋىن ۇرپاقتى مەيىربان داۋسىمەن وياتىپ, تاربيەلەگەن, ۇلتتىڭ ۇنىندەي بولعان التىن داۋىس يەسىنىڭ عيبراتتى عۇمىرىنان سىر شەرتەتىن ءبىر كىتاپتى وقىرمانعا تارتۋ ەتۋ كەرەك دەگەن وي كوكەيىمنەن كەتپەدى. بۇل كىتاپتا دۋلات يسابەكوۆ, ءىليا جاقانوۆ, ءاسانالى ءاشىموۆ, دۇكەنباي دوسجان, قاسىمحان ەرسارين, كوپەن امىربەك, نامازالى وماشەۆ, نازاربەك قاناپيا ۇلى, امانجول ەڭسەباەۆ, باۋىرجان ومار ۇلى, ءامىرحان مەڭدەكە سىندى زيالى قاۋىمنىڭ تولعامدى, جاقسى دۇنيەسى جيناقتالعان. «ساحارا ساندۋعاشىن» سول ءۇشىن وقۋ كەرەك», دەيدى قۇراستىرۋشى تاڭسۇلۋ الدابەرگەنقىزى.
296 بەتتەن تۇراتىن كىتاپتى «اتامۇرا» باسپاسى وقىرمانعا 1000 دانامەن ۇسىنىپ وتىر. ەرەكشە بەزەندىرىلگەن ەڭبەكتىڭ سوڭعى بەتتەرىندە ديكتور بولعىسى كەلەتىندەرگە ارنالعان كەڭەستەر مەن ارنايى جاتتىعۋ ۇلگىسى بەرىلگەن. سونداي-اق كىتاپ سوڭىندا ەكى QR تۇر. وندا ساۋىق جاقانوۆانىڭ وقىعان ولەڭدەرى ۇسىنىلعان. قازاق راديوسىنىڭ «التىن قورىندا» ساۋىق جاقانوۆانىڭ وقۋىندا 500-دەن استام ادەبي-مادەني, دەرەكتى, كوركەم شىعارما مەن 100-دەن استام ەرتەگى جازىلىپ, ساقتالعان.
كىتاپحاناداعى رۋحاني كەشكە ۇلت زيالىلارى نۇرلان ورازالين, فاۋزيا ورازباەۆا, ءحانبيبى ەسەنقاراقىزى, باق سالاسىنىڭ مايتالمانى نۇرجان جالاۋقىزى, «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد, بەلگىلى قالامگەرلەر, ساۋىق جاقانوۆانىڭ تۋىستارى, دوستارى, شاكىرتتەرى مەن زامانداستارى قاتىستى.
الماتى