استانا قالاسىندا «Taldau Run» سپورتتىق جۇگىرۋ جارىسى ءوتتى. سپورتتىق ءىس-شاراعا ساراپشىلار كلۋبىنىڭ مۇشەلەرى, سەنات جانىنداعى «تالداۋ مەكتەبىنىڭ» تۇلەكتەرى جانە سالاماتتى ءومىر سالتىن دارىپتەپ جۇرگەن بەلسەندى ازاماتتار قاتىستى.
سەنات توراعاسى ماۋلەن اشىمباەۆ جارىسقا قاتىسۋشىلارعا ءىلتيپات بىلدىرە كەلىپ, مەملەكەت باسشىسى قازاقستاندا سپورتتى دامىتۋعا ۇلكەن كوڭىل ءبولىپ وتىرعانىن اتاپ ءوتتى. سپورت – ەلىمىزدە قولعا الىنعان اۋقىمدى الەۋمەتتىك ساياساتتىڭ ماڭىزدى باعىتتارىنىڭ ءبىرى. سونىڭ اياسىندا بۇل سالانى ىلگەرىلەتۋگە قاجەتتى جاعداي جاساۋ ءۇشىن كەشەندى شارالار قابىلدانىپ جاتىر.
«پرەزيدەنت قاسىم-جومارت توقاەۆ ەلىمىزدە سپورتتى دامىتۋعا ءاردايىم باسا ءمان بەرىپ كەلەدى. مەملەكەت باسشىسىنىڭ تاپسىرماسىمەن بۇل باعىتتا جۇيەلى جۇمىس اتقارىلىپ جاتىر. قازاقستاننىڭ بارلىق وڭىرىندە كاسىبي, بۇقارالىق جانە ينكليۋزيۆتى سپورتتى دامىتۋعا ارنالعان ماڭىزدى جوبالار ءساتتى جۇزەگە اسىرىلىپ جاتىر. «تالداۋ مەكتەبىنىڭ» ۇيىتقى بولۋىمەن وتكەن ءىس-شارا سول سالاداعى باستامالارعا قوسىلعان ايتارلىقتاي ۇلەس ەكەنى ءسوزسىز», دەدى م.اشىمباەۆ.
سونىمەن قاتار قىتايدىڭ حاربين قالاسىندا ءىح قىسقى ازيا ويىندارى اياقتالعانى, وندا وتانداستارىمىز جارقىن جەڭىستەرگە قول جەتكىزگەنى ءسوز بولىپ, بۇقارالىق سپورتتى دامىتۋدى كوزدەيتىن جوبانىڭ وسىنداي ۇلكەن سپورت مەرەكەسىمەن تۇسپا-تۇس كەلۋىنىڭ رامىزدىك مانىنە نازار اۋدارىلدى. وسىعان بايلانىستى ماۋلەن اشىمباەۆ الداعى ۋاقىتتا «Taldau Run» جۇگىرۋ جارىسى «تالداۋ مەكتەبىنىڭ» قاتىسۋشىلارى ءۇشىن يگى داستۇرگە جانە ماڭىزدى نەتۆوركينگكە اينالاتىنىنا سەنىم ءبىلدىردى.
سونداي-اق سپيكەر «تالداۋ مەكتەبىنىڭ» ءتورتىنشى كەزەڭىنىڭ اياقتالۋىنا نەبارى ەكى اپتا ۋاقىت قالعانىن تىلگە تيەك ەتتى. سوندىقتان يدەيالاردى بىرلەسىپ تالقىلاۋ, ۇسىنىستار مەن باستامالاردى ازىرلەۋ ءۇشىن ءاربىر كەزدەسۋدى بەلسەندى جانە ساپالى پايدالانۋدىڭ ماڭىزى زور. ايتا كەتەيىك, «تالداۋ مەكتەبى» جوباسى مەملەكەتتىك باسقارۋدا, الەۋمەتتىك جانە گۋمانيتارلىق زەرتتەۋلەردە, باق-تا اناليتيكالىق تاسىلدەردى كۇشەيتۋدى كوزدەيدى.