ورالدا جەرگىلىكتى قامتۋدى دامىتۋ جانە جۇمىس ورىندارىن ساقتاۋ ماسەلەلەرىنە ارنالعان كەڭەس وتكىزىلدى. وعان ارنايى كەلگەن ينۆەستيتسيالار جانە دامۋ ءمينيسترى اسەت يسەكەشەۆ الەمدىك ەكونوميكانىڭ ءبىر بولشەگى بولىپ تابىلاتىن قازاقستانعا الەم ەلدەرىندەگى ەكونوميكالىق قارجى داعدارىسى مەن رەسەي ءرۋبلى قۇنسىزدانۋىنىڭ جاناما اسەرى ءتيىپ وتىرعانىن ايتتى. وسىنداي كەزدە كاسىپورىنداردى جۇمىسپەن قامتاماسىز ەتۋ, ولاردىڭ وندىرىستىك قۋاتىن قاجەتتى دەڭگەيدە ۇستاۋ, جۇمىس ورىندارىن ساقتاۋ اسا ماڭىزدى دەدى ول. بۇل ءۇشىن مەملەكەتتىك ورگاندار ۇلتتىق كومپانيالارمەن بىرگە وتاندىق تاۋارلاردىڭ ءباسىن كوتەرۋ ماسەلەلەرىمەن اينالىسۋلارى قاجەت. ءمينيستردىڭ ايتۋىنشا, قازىرگى كۇنى مۇناي-گاز كومپانيالارى بيۋدجەتتەرى كەمۋى سالدارىنان ولاردان تاپسىرىستار الاتىن ورتا جانە شاعىن بيزنەسكە قاتىستى تۇيتكىلدى ماسەلەلەر تۋىنداپ وتىر. سونداي-اق, قازىرگى كەزدە جەرگىلىكتى ءوندىرىسشىنى قولداپ, قاجەتتى تاۋارلار الۋدىڭ مۇمكىندىكتەرىن ىزدەستىرۋ ءىسىنىڭ دە ماڭىزى زور. مۇنداعى ماقسات – ءوندىرىس ورىندارىنداعى تۇراقتىلىقتى ساقتاۋعا باعىتتالعان. مەملەكەت باسشىسىنىڭ تاپسىرماسى بويىنشا رەسپۋبليكادا ءوندىرىس ۇدەرىستەرىن تۇراقتاندىرۋ جانە جۇمىسكەرلەردىڭ ەڭبەك قۇقىقتارى مەن كەپىلدىكتەرىن قامتاماسىز ەتۋ جونىندە وبلىس اكىمدىكتەرى مەن ءىرى كاسىپورىندار اراسىندا ءوزارا ىنتىماقتاستىق تۋرالى مەموراندۋمدار جاساۋ بويىنشا كەڭ اۋقىمدى ىستەر باستالدى. ەلىمىزدىڭ بارلىق ايماعىندا وسىنداي شارالار وتكىزىلۋدە. قازىردىڭ وزىندە وسىنداي 12 كەڭەس وتكىزىلىپ, بارلىعى 200 مەموراندۋمعا قول قويىلعان. بۇدان ءارى ەنەرگەتيكا ءمينيسترى ۆلاديمير شكولنيك ۇكىمەت ەلباسى جولداۋىنا سايكەس ورتا مەرزىمدە ەكونوميكانى دامىتۋدىڭ باستى قۇرالى بولا الاتىن 2020 جىلعا دەيىنگى مەرزىمگە ارنالعان «نۇرلى جول» اتتى ينفراقۇرىلىمدى دامىتۋ بويىنشا كەڭ اۋقىمدى مەملەكەتتىك باعدارلاما ازىرلەنگەنىن العا تارتتى. مۇندا قازاقستاندىق قامتۋدى دامىتۋ مەن وتاندىق بيزنەستى قولداۋدىڭ وزەكتى ماسەلەلەرى قامتىلعان. ال باتىس قازاقستان وبلىسىنىڭ اكىمى نۇرلان نوعاەۆ كۇن تارتىبىنە قويىلىپ وتىرعان ماسەلەلەر بويىنشا وبلىستا 303,3 ميلليارد تەڭگەنىڭ 38 جوباسى قولعا الىنعانىن جەتكىزدى. سونىمەن بىرگە, الداعى ۋاقىتتا وڭىردە 2100 جاڭا جۇمىس ورنى اشىلماق. ينۆەستورلار جوبالارىن جۇزەگە اسىرۋ بارىسىندا قۋات ۇنەمدەيتىن جانە ءونىمنىڭ وزىندىك قۇنىن ازايتۋعا باعىتتالعان جاڭا تەحنولوگيالار قولدانىلا باستادى. وسى ارقىلى وبلىس كاسىپورىندارىندا باسەكەگە قابىلەتتىلىك دەڭگەيىن كوتەرۋ كوزدەلگەن. فورۋم اياسىندا اتقارۋشى بيلىك ۇلتتىق كومپانيا باسشىلارى, كاسىپوداق ۇيىمىنىڭ جەتەكشىلەرى وبلىستىڭ ىرگەلى كاسىپورىندارىمەن جۇمىس ورنىن ساقتاۋ ماسەلەلەرى 8 جانە ۇلتتىق كومپانيالار مەن جەر قويناۋىن پايدالانۋشىلار اراسىندا 20 مەموراندۋمعا قول قويىلدى. ونىڭ جالپى قۇنى 47 ميلليارد تەڭگە قۇرايدى. تەمىر قۇسايىن, «ەگەمەن قازاقستان». باتىس قازاقستان وبلىسى.