عىلىم جانە جوعارى ءبىلىم مينيسترلىگىنىڭ كەڭەيتىلگەن القا وتىرىسى ءوتتى. بۇل ءىس-شاراعا پارلامەنت دەپۋتاتتارى, ۋنيۆەرسيتەت رەكتورلارى, عىلىمي زەرتتەۋ ينستيتۋتتاردىڭ باسشىلارى, مينيسترلىككە قاراستى ۇيىمداردىڭ جەتەكشىلەرى, ساراپشىلار قاتىستى. كۇن تارتىبىندە كادر دايارلاۋ, يننوۆاتسيا, تەحنولوگيا جانە ونەركاسىپپەن ىنتىماقتاستىق ماسەلەلەرى قاراستىرىلدى, وتكەن جىلعى جەتىستىكتەر مەن جاڭا جىلعى جوسپارلار ايتىلدى.
جيىندا ءسوز العان عىلىم جانە جوعارى ءبىلىم ءمينيسترى ساياسات نۇربەك ءوز بايانداماسىندا 2024 جىلى اتقارىلعان جۇمىستاردى, مينيسترلىكتىڭ نەگىزگى باعىتتارىن, 2025 جىلعا ارنالعان ماقساتتار مەن مىندەتتەردى تولىعىراق بايانداپ, اتالعان ماسەلەلەر بويىنشا جۇمىس جۇرگىزىلىپ جاتقانىن اتاپ ءوتتى. ءمينيستردىڭ ايتۋىنشا, بارلىق ازامات ءۇشىن قولجەتىمدى جوعارى ءبىلىم بەرۋ – مينيسترلىكتىڭ باستى مىندەتتەرىنىڭ ءبىرى. وسى ماقساتتا 2024–2025 وقۋ جىلىنا 94 251 گرانت ءبولىندى, سونداي-اق باكالاۆريات ستۋدەنتتەرىنە ستيپەنديا 20%-عا, ماگيسترانتتار مەن دوكتورانتتارعا 15%-عا ارتتى. بىلتىر العاش رەت سارالانعان گرانتتار ەنگىزىلدى. جاڭا مودەل بويىنشا مەملەكەت وقۋ اقىسىنىڭ 50%-ىن وتەيدى, ال ستۋدەنتتەر تولىق ستيپەنديا الادى.
«بۇل قادام ستۋدەنتتەردىڭ قارجىلىق جۇكتەمەسىن جەڭىلدەتۋ جانە ولاردىڭ وقۋ جاعدايلارىن جاقسارتۋ ماقساتىندا جاسالدى. وتكەن جىلى ماڭىزدى ماسەلەنىڭ ءبىرى رەتىندە «كەلەشەك» بىرىڭعاي ەرىكتى جيناقتاۋ جۇيەسىن ەنگىزۋ تۋرالى زاڭ جوباسى قابىلداندى. «كەلەشەك» جۇيەسى اتا-انالارعا بالالارىن بولاشاقتا وقىتۋ ءۇشىن قارجى جيناقتاۋعا مۇمكىندىك بەرىپ, مەملەكەت تاراپىنان بىرجولعى ءبىلىم كاپيتالى قاراستىرىلعان», دەدى س.نۇربەك.
مينيسترلىك سونداي-اق قازاقستاندى ورتالىق ازيانىڭ جەتەكشى ءبىلىم بەرۋ حابى رەتىندە قالىپتاستىرۋ ماقساتىندا حالىقارالىق سەرىكتەستەرمەن ىنتىماقتاستىقتى كەڭەيتىپ, شەتەلدىك ستۋدەنتتەر ءۇشىن جاعدايدى جاقسارتۋ كوزدەلگەن. قازىرگى تاڭدا قازاقستاندا 12 ەلدىڭ 34 جوعارى وقۋ ورنىمەن ستراتەگيالىق سەرىكتەستىك ورناتىلعان. سونداي-اق ەلىمىزدە ۇلىبريتانيا, يتاليا, قىتاي, رەسەي, اقش, فرانتسيا جانە وڭتۇستىك كورەيانىڭ 23 جەتەكشى ۋنيۆەرسيتەتىنىڭ فيليالدارى اشىلدى.
«قازاقستاندى ورتالىق ازياداعى ءبىلىم بەرۋ جانە عىلىمي الماسۋدىڭ ورتالىعىنا اينالدىرۋدى ماقسات ەتىپ وتىرمىز, الەمنىڭ تۇكپىر-تۇكپىرىنەن ەڭ ۇزدىك سەرىكتەستەردى تارتا وتىرىپ, شەتەلدىك ۋنيۆەرسيتەتتەردىڭ فيليالدارىن اشۋ جانە شەتەلدىك ستۋدەنتتەردىڭ ءبىزدىڭ بىلىمگە دەگەن قىزىعۋشىلىعى تاڭدالعان باعىتتىڭ دۇرىستىعىن كورسەتەدى», دەپ اتاپ ءوتتى س.نۇربەك.
قازاقستاندا قازىرگى تاڭدا 31 500 شەتەلدىك ستۋدەنت ءبىلىم الىپ جاتىر, ولاردىڭ قاتارىندا ازيادان كەلگەن ستۋدەنتتەردىڭ سانى تمد ەلدەرىنەن كەلگەندەردەن ارتتى. شەتەلدىك ۋنيۆەرسيتەتتەر ەلىمىزدە ءوز فيليالدارىن اشۋ ارقىلى ەل ەكونوميكاسىنا ينۆەستيتسيالار تارتۋعا دا ىقپال ەتىپ جاتىر. مىسالى, «De Montfort University» 16 ميلليون اقش دوللارىن, ال «Coventry University» 50 ميلليون اقش دوللارىن ينۆەستيتسيالادى. سونداي-اق لۋ بان شەبەرحانالارىنا 8 ميلليون يۋان ءبولىندى. بۇل ينۆەستيتسيالار ءبىلىم ينفراقۇرىلىمىن دامىتۋعا, جاڭا جۇمىس ورىندارىن اشۋعا جانە ەلىمىزدىڭ ەكونوميكاسىنا قوسىمشا مۇمكىندىكتەر جاساۋعا سەپتىگىن تيگىزىپ وتىر.
ءبىلىم بەرۋ ۇدەرىسىنە يننوۆاتسيالىق تەحنولوگيالاردى ەنگىزۋ اياسىندا مينيسترلىك الەمدەگى تەحنولوگيالار سالاسىنداعى كوشباسشىلارمەن, مىسالى, «Coursera», «Google», «Nvidia», «Huawei Technologies Kazakhstan», «01 Edu System» جانە «Binance Kazakhstan» كومپانيالارىمەن ستراتەگيالىق سەرىكتەستىكتەر ورناتتى. بۇل كەلىسىمدەر ستۋدەنتتەر مەن وقىتۋشىلارعا ەڭ جاڭا ءبىلىم بەرۋ پلاتفورمالارى مەن كۋرستارعا قولجەتىمدىلىك بەردى.
«مۇنداي الەمدىك الپاۋىتتارمەن سەرىكتەستىك وقىتۋشىلار مەن ستۋدەنتتەردىڭ بىلىكتىلىگىن ارتتىرۋعا جانە ءبىلىم بەرۋ ۇدەرىسىنە يننوۆاتسيالىق تەحنولوگيالاردى ەنگىزۋگە جاڭا مۇمكىندىكتەر اشادى. پرەزيدەنتىمىز عىلىمدى دامىتۋعا ەرەكشە نازار اۋدارىپ وتىر. مەملەكەت تاراپىنان عالىمدارعا, سونىڭ ىشىندە جاس عالىمدارعا جان-جاقتى قولداۋ كورسەتىلدى. 2024 جىلى مەملەكەت باسشىسىنىڭ تاپسىرماسىمەن 315 جاس عالىمعا پاتەر بەرىلدى. ولاردىڭ 290-ى «وتباسى بانك» اق-مەن بىرلەسىپ جۇزەگە اسىرىلعان ارنايى نەسيە باعدارلاماسى بويىنشا پاتەر الدى, ال 25-ءى تەگىن نەگىزدە پاتەرگە يە بولدى», دەپ اتاپ ءوتتى مينيستر.
وتىرىستا سونداي-اق عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ ءسوز سويلەپ, ەلىمىزدە حالىقارالىق ستاندارتتار مەن پراكتيكالىق تاجىريبەگە نەگىزدەلگەن ينجەنەرلىك كادرلاردى دايارلاۋ ۇلتتىق مودەلىن دامىتۋ جۇمىستارى جالعاسىپ جاتقانىن ايتتى. بۇل مودەلدىڭ باستى اسپەكتىلەرىنىڭ ءبىرى – جۇمىس بەرۋشىلەرمەن بەلسەندى ىنتىماقتاستىق. ماسەلەن, Satbayev University 39 كافەدرا فيليالىن ونەركاسىپتىك كاسىپورىنداردا, سونىڭ ىشىندە استانا ەلەكتروتەحنيكالىق زاۋىت بازاسىندا اشتى. سونىمەن قاتار ەلىمىزدىڭ 30 ۋنيۆەرسيتەتى شامامەن 100 كوللەدجبەن سەرىكتەستىك ورناتىپ, ءوزارا ءبىلىم باعدارلامالارىن جۇزەگە اسىرىپ كەلەدى.
ال عىلىم جانە جوعارى ءبىلىم ۆيتسە-ءمينيسترى دينارا ششەگلوۆا 2024 جىلى جوعارى ءبىلىمنىڭ تسيفرلىق ترانسفورماتسياسى اياسىندا ۇلكەن قادام جاسالعانىن جەتكىزدى. سونىڭ ءبىرى وتكەن جىلى مەملەكەت باسشىسىنا تانىستىرىلعان AI-Sana باعدارلاماسى بولدى. «بۇل بىرەگەي باعدارلاما 100 مىڭ قاتىسۋشىنى قامتيدى جانە ءبىلىم بەرۋ, زەرتتەۋ, قولدانبالى تاسىلدەردى بىرىكتىرەدى. باعدارلاما «Stanford University», «Imperial College London» سياقتى جەتەكشى ۋنيۆەرسيتەتتەردىڭ الەمدىك دەڭگەيدەگى ساراپشىلارىنىڭ قاتىسۋىمەن ازىرلەندى», دەدى د.ششەگلوۆا.
سونداي-اق ەلىمىزدىڭ جوعارى وقۋ ورىندارى ءۇشىن جاساندى ينتەللەكت ستاندارتى قابىلداندى. ناتيجەسىندە, 20 جەتەكشى ۋنيۆەرسيتەت 20 ءبىلىم بەرۋ باعدارلاماسىن ازىرلەدى, بۇل جاساندى ينتەللەكت سالاسىنداعى جاڭا مامانداردى دايارلاۋ ءۇشىن نەگىز بولدى.
جيىن سوڭىندا مينيستر ساياسات نۇربەك 17 جاس عالىمعا پاتەر سەرتيفيكاتىن سالتاناتتى تۇردە تابىستادى.