تۇركىستان وبلىسى قازىعۇرت اۋىلىندا 2 قاباتتى, 8 پاتەرلى 5 تۇرعىن ءۇيدىڭ قۇرىلىسى اياقتالدى. اۋدانعا ءىس-ساپارمەن بارعان وبلىس اكىمى نۇرالحان كوشەروۆ تۇرعىن ءۇي كەزەگىندە تۇرعان 40 وتباسىنا جاڭا پاتەر كىلتتەرىن تاپسىردى, دەپ جازادى Egemen.kz.
اتالعان ۇيلەردىڭ قۇرىلىسى بىلتىر ناۋرىز ايىندا باستالعان بولاتىن. جالپى وبلىس قۇرىلعالى, ياعني 2018-2024 جىلدار ارالىعىندا 14 مىڭنان اسا وتباسى تۇرعىن ۇيمەن قامتىلدى. ونىڭ ىشىندە, كوممۋنالدىق تۇرعىن ۇيمەن 7 567 وتباسى, ال «7-20-25» جانە «وتباسى بانك» باعدارلامالارى ارقىلى 6 594 وتباسى يپوتەكالىق تۇرعىن ۇيمەن قامتاماسىز ەتىلدى.
ياعني جىلىنا شامامەن كوممۋنالدىق تۇرعىن ءۇي قورىنان جانە ءتۇرلى يپوتەكالىق باعدارلامالار ارقىلى 2 200-گە جۋىق پاتەر تابىس ەتىلگەن. وتكەن جىلدىڭ وزىندە ءوڭىر تۇرعىندارى 1174 كوممۋنالدىق جانە 977 يپوتەكالىق ءۇي العان.