تاراز مەملەكەتتىك پەداگوگيكالىق ينستيتۋتىنىڭ ۇيىتقى بولۋىمەن جامبىل وبلىستىق كورمە زالىندا قازاق حاندىعىنىڭ 550 جىلدىعىنا وراي «ونەر – اتا-ءداستۇر مۇراسى» اتتى كورمە ۇيىمداستىرىلدى. «كارى تاريحتىڭ قويناۋىنا ۇڭىلەر بولساق, اتتىڭ جالىندا, تۇيەنىڭ قومىندا كۇن كەشكەن قيلى-قيلى زامانداردا قانشاما ەل مەن جۇرت ءتۇرلى الاپاتتاردىڭ جويقىنىنا توتەپ بەرە الماي, جۇتىلىپ كەتە باردى. ءتىپتى, جەر بەتىنەن جوعالىپ كەتكەندەرى دە جەتەرلىك. اللاعا شۇكىرشىلىك, ۇلان-بايتاق جەرىمىز, تورتكۇل دۇنيە مويىنداعان ەگەمەن مەملەكەتىمىز بار. «وتكەنىن ۇمىتقان – وشكەندىكتىڭ بەلگىسى, وتكەنىن ەسكە العان – وسكەندىكتىڭ بەلگىسى» دەگەن, بۇل ءىس-شارانىڭ جاس ۇرپاققا بەرەر ءتالىمى زور», دەيدى وقۋ ورنىنىڭ رەكتورى, پروفەسسور داريا قوجامجاروۆا.
كورمەگە اتالمىش وقۋ ورنىنىڭ شىعارماشىلىق ماماندىقتار فاكۋلتەتىنىڭ وقىتۋشىلارى مەن ستۋدەنتتەرىنىڭ 60-تان استام قولدانبالى ونەر جانە كەسكىندەمە جانرىنداعى تۋىندىلارى قويىلدى. اتاپ ايتقاندا, ق.نۇربايقىزىنىڭ «ايشا ءبيبى», ا.امانجولدىڭ «شەبەر قولى», ا.نەيفەلبدتىڭ «بەسىك», ا.جانقوجاەۆانىڭ «كاراۆان» اتتى كارتينالارى تاريحتىڭ تەرەڭ قويناۋىنان سىر شەرتەدى. ال, ج.تۇرماحانوۆانىڭ «بايتەرەك تاريحى», ش.جۇماليەۆانىڭ «استانا جولى», گ.نۇرپاشتىڭ «ەرتەگى الەمى», ج.قيلىباەۆانىڭ «كوكتەم كوڭىلى», ا.فيەشكانىڭ «نەجنوست» تاقىرىبىنداعى ونەر تۋىندىلارىندا ەگەمەن ەلىمىزدىڭ جەتكەن جەتىستىكتەرى مەن تولايىم تابىستارى كوركەم بەينەلەنگەن. سونىمەن قاتار, ۇلتتىق مۋزىكالىق اسپاپتار مەن كيىمدەر, كۇندەلىكتى تۇرمىس-تىرشىلىكتە قولدانىلعان زاتتار قالا تۇرعىندارى مەن قوناقتارىنىڭ نازارىن اۋداردى.
ورالحان ءداۋىت,
«ەگەمەن قازاقستان».
جامبىل وبلىسى.