تۇركىستان وبلىسىنىڭ كاسىپكەرلەرى جاڭا سالىق رەفورماسىن تالقىلادى

كەزدەسۋ بارىسىندا قاتىسۋشىلار جاڭا سالىق كودەكسىندەگى وزگەرىستەر جايىن ايتىپ, ونىڭ بيزنەسكە ىقپالىن سارالادى.

«BNK Group LTD» جشس باس ديرەكتورى نيازالى بەيسەنباەۆ قازاقستاندا قوسىلعان قۇن سالىعىنىڭ 20%-عا كوتەرىلۋىنىڭ اگروونەركاسىپ كەشەن وندىرۋشىلەرىنە ىقتيمال اسەرىنە توقتالدى.

«مولشەرلەمەنىڭ ءوسۋى شاعىن جانە ورتا بيزنەسكە قوسىمشا سالماق تۇسىرەدى. سوندىقتان ۇكىمەتكە كەيبىر باسىم سالالار ءۇشىن ديففەرەنتسيالدى سالىق مولشەرلەمەسىن ەنگىزۋ, تابىسى تومەن كاسىپورىندارعا ۋاقىتشا سالىقتىق دەمالىس بەرۋ جانە كولەڭكەلى ەكونوميكامەن كۇرەسۋ شارالارىن كۇشەيتۋ ماسەلەسىن قاراستىرۋدى ۇسىنامىز. بۇل كاسىپكەرلەر مەن تۇتىنۋشىلارعا كەلەتىن تەرىس اسەردى ازايتۋعا مۇمكىندىك بەرەدى», دەدى ول.

ءوز كەزەگىندە, ۇلتتىق ەكونوميكا ۆيتسە-ءمينيسترى باۋىرجان قۇدايبەرگەنوۆ قازىرگى ۋاقىتتا اگرارلىق سەكتوردا شارۋا قوجالىقتارى ققس تولەمەيتىنىن, ال زاڭدى تۇلعالار قولدانىستاعى جەڭىلدىكتەردىڭ ارقاسىندا بيۋدجەتكە تولەنۋگە ءتيىستى سالىقتاردىڭ تەك 30%-ىن عانا تولەيتىنىن اتاپ ءوتتى. جاڭا مەحانيزمدەر بويىنشا ولاردىڭ ەشقايسىسى ققس تولەمەيدى. بۇل قازاقستاندىق اۋىل شارۋاشىلىعى ونىمدەرىن (كارتوپ, قىزاناق, پياز جانە ت.ب.) باسەكەگە قابىلەتتى ەتۋگە مۇمكىندىك بەرەدى. 10% مولشەرلەمە قولدانىلاتىن سالالار ءالى دە بيزنەس وكىلدەرىمەن تالقىلانىپ جاتىر.

«كەلەسى مەحانيزمدى قاراستىرۋ ۇسىنىلادى: جالپى بەلگىلەنگەن ققس مولشەرلەمەسى – 16%, اۋىل شارۋاشىلىعى ونىمدەرىن وندىرۋشىلەردى ققس-دان تولىق بوساتۋ, ال كەيبىر سالالار ءۇشىن ارالىق مولشەرلەمە كولەمى 10%. وسىلايشا, ۇكىمەت ۇسىنعان مولشەرلەمەلەردىڭ ديففەرەنتسياتسياسى 16%, 10%, 0% جانە تولىق بوساتۋدى قامتيدى»,  دەپ ءتۇسىندىردى باۋىرجان قۇدايبەرگەنوۆ.

كەزدەسۋ بارىسىندا بيزنەس وكىلدەرى سالىقتىق جۇكتەمەنىڭ ارتۋىنا بايلانىستى الاڭداۋشىلىقتارىن ءبىلدىرىپ, ءوز ۇسىنىستارىن جەتكىزدى. ال ۇلتتىق ەكونوميكا مينيسترلىگى وكىلدەرى بارلىق پىكىر مەن ۇسىنىستاردىڭ نازارعا الىناتىنىن مالىمدەدى.