سەناتتىڭ قارجى جانە بيۋدجەت كوميتەتىنىڭ دەپۋتاتتارى «زەينەتاقى اكتيۆتەرىن باسقارۋدىڭ تيىمدىلىگى» اتتى دوڭگەلەك ۇستەل وتكىزدى.
قاتىسۋشىلار ءىس-شارا بارىسىندا جيناقتاۋشى زەينەتاقى جۇيەسىنىڭ قازىرگى جاعدايىن, بىرىڭعاي جيناقتاۋشى زەينەتاقى قورىنىڭ ينۆەستيتسيالىق ستراتەگياسىنىڭ تيىمدىلىگىن جانە ازاماتتاردىڭ مۇددەسىن ەسكەرە وتىرىپ, زەينەتاقى اكتيۆتەرىن باسقارۋ تەتىكتەرىن جەتىلدىرۋ ماسەلەلەرىن تالقىلادى.
كوميتەت توراعاسى سۇلتانبەك ماكەجانوۆ ءوز سوزىندە زەينەتاقى جيناقتارىن ءتيىمدى ينۆەستيتسيالاۋ زەينەتاقى جۇيەسىنىڭ تۇراقتىلىعىن قامتاماسىز ەتۋدەگى ماڭىزدى فاكتور ەكەنىن اتاپ ءوتتى.
«زەينەتكەرلىك جاسقا دەيىنگى جيناقتالعان قاراجاتتىڭ جاي عانا شوتتا ساقتالماي, كوبەيىپ وتىرۋى ءۇشىن ونى ءتيىمدى ينۆەستيتسيالاۋ قاجەت. زەينەتاقى جيناقتارىن ينۆەستيتسيالاۋدىڭ تيىمدىلىگى ازاماتتاردىڭ زەينەتاقىمەن قامسىزداندىرىلۋ دەڭگەيىنە تىكەلەي اسەر ەتەدى. سوندىقتان بۇل ماسەلە ءاردايىم قوعام ءۇشىن وزەكتى بولىپ قالا بەرمەك», دەدى ول.
دەپۋتاتتار, مەملەكەتتىك ورگان وكىلدەرى مەن ساراپشىلار تالقىلاۋ بارىسىندا جيناقتاۋشى زەينەتاقى جۇيەسىنىڭ ماكروەكونوميكالىق كورسەتكىشتەرىن, زەينەتاقى اكتيۆىنىڭ قازىرگى ءبولىنىسىن جانە ونىڭ ينۆەستيتسيالىق تيىمدىلىگىن قاراستىردى. اسىرەسە, زەينەتاقى قارجىسىن ينفراقۇرىلىمدىق جانە اگرارلىق جوبالاردى قارجىلاندىرۋعا پايدالانۋ ماسەلەسىنە, سونداي-اق زەينەتاقى جيناقتارىنىڭ كىرىستىلىگىن ارتتىرۋ جولدارىنا ەرەكشە نازار اۋداردى.
دوڭگەلەك ۇستەل وتىرىسىنا قاتىسۋشىلار زەينەتاقى اكتيۆتەرىن باسقارۋ جۇيەسىن جەتىلدىرۋگە باعىتتالعان بىرقاتار ۇسىنىس ازىرلەدى. بۇل ۇسىنىستار جان-جاقتى قاراستىرۋ جانە ىسكە اسىرۋ ءۇشىن ءتيىستى مەملەكەتتىك ورگاندارعا جولدانادى.