ەلىمىزدە تاعى ءبىر اقىلى جول پايدا بولادى

قر كولىك ءمينيسترىنىڭ مىندەتىن اتقارۋشى «اقتوبە – رەسەي فەدەراتسياسىنىڭ شەكاراسى (ورىنبورعا) رەسپۋبليكالىق ماڭىزى بار جالپىعا ورتاق پايدالانىلاتىن اۆتوموبيل جولىنىڭ ۋچاسكەسىن اقىلى نەگىزدە پايدالانۋ تۋرالى» بۇيرىققا قول قويدى.

رەسپۋبليكالىق ماڭىزى بار ءىى ساناتتاعى جالپىعا ورتاق پايدالانىلاتىن اۆتوموبيل جولىنىڭ اقتوبە – مارتوك – رەسەي فەدەراتسياسىنىڭ شەكاراسى (ورىنبورعا دەيىن) ۋچاسكەسى اقىلى جولعا اينالدى.

اقىلى جولدىڭ ۇزىندىعى 82 شاقىرىم 692 مەتر, جولاق ەنى 3,75 مەتردەن كەم ەمەس.

جول ءجۇرۋ قۇنى كەلەسىدەي بولماق:

16 ورىندىق اۆتوبۋستار مەن جۇك كوتەرىمدىلىگى 2,5 تونناعا دەيىنگى جۇك كولىكتەرى ءۇشىن الدىن الا تولەم 515 تەڭگە, كەيىنگى تولەم 600 تەڭگە; 

32 ورىندىق اۆتوبۋستار مەن جۇك كوتەرىمدىلىگى 5,5 تونناعا دەيىنگى جۇك كولىكتەرى ءۇشىن الدىن الا تولەم 1 220 تەڭگە, كەيىنگى تولەم 1 038 تەڭگە;

32-دەن استام ورىندىق اۆتوبۋستار مەن جۇك كوتەرىمدىلىگى 10 تونناعا دەيىنگى اۆتوپوەزد ءۇشىن الدىن الا تولەم 1820 تەڭگە, كەيىنگى تولەم 1544 تەڭگە;

جۇك كوتەرىمدىلىگى 10 توننادان 15 تونناعا دەيىنگى جۇك كولىكتەرى ءۇشىن الدىن الا تولەم 2 440 تەڭگە, كەيىنگى تولەم 2 078 تەڭگە;

جۇك كوتەرىمدىلىگى 15 توننادان اساتىن جۇك كولىكتەرى ءۇشىن الدىن الا تولەم 3 040 تەڭگە جانە كەيىنگى تولەم 2 583 تەڭگەنى قۇرايدى. 

ايتا كەتەيىك, جەڭىل كولىكتەر ءۇشىن جول قۇنى تەگىن بولادى.