«اقتوبە-ورال-رەسەي شەكاراسى» تاس جولىنىڭ ۋچاسكەسىندە («سىرىم» وتكىزۋ پۋنكتى) قايتا جوندەۋ جۇمىستارى جۇرگىزىلەدى, دەپ حابارلايدى Egemen.kz «قازاۆتوجولدىڭ» ءباسپاسوز قىزمەتىنە سىلتەمە جاساپ.
ۆەدومستۆونىڭ حابارلاۋىنشا, 2025 جىلعى 12 اقپاننان باستاپ اتالعان اۆتوجولدىڭ 263-265 شاقىرىم ارالىعىنداعى ۋچاسكەسىندە كولىك ايرىعىنىڭ قايتا جاڭارتۋ جۇمىستارىنا بايلانىستى قوزعالىسقا شەكتەۋ قويىلادى.
«باتىس قازاقستان وبلىسىندا رەسپۋبليكالىق ماڭىزى بار «پودستەپنوە - فەدوروۆكا - رف شەكاراسى» اۆتوجولىنىڭ 0-36 شاقىرىم ارالىعىندا قايتا جاڭارتۋ جوباسى جۇزەگە اسىپ جاتىر. بۇل جول «اقتوبە - ورال - رف شەكاراسى» اۆتوجولىمەن جاناسادى. جوبا بويىنشا قۇرىلىس جۇمىستارىن جۇرگىزىپ جاتقان مەردىگەر «بەدە جاپىراعى» ادىسىمەن كولىك ايرىعىن سوعۋ جانە ءۇيىندى مەن وتپەجولدى سالۋ بويىنشا نەگىزگى جۇمىستاردى باستايدى», دەلىنگەن حابارلامادا.
سونىمەن قاتار, وتپەجولدىڭ تىرەك بولىكتەرىن ورناتۋعا بايلانىستى «اقتوبە - ورال - رف شەكاراسى (سىرىم وتكىزۋ پۋنكتى)» اۆتوجولىنىڭ 263-265 شاقىرىم ارالىعىنداعى ۇزىندىعى 1,5 شاقىرىم ۋچاسكەسى, سونداي-اق اتىراۋ باعىتىنداعى جول قيىلىسى ۋاقىتشا جابىلادى. قوزعالىس نەگىزگى اۆتوجولدىڭ سول جاعىنداعى ۋاقىتشا اينالما جول (ۇزىندىعى 2,2 شاقىرىم) ارقىلى جۇزەگە اساتىن بولادى.