ەڭبەك نارىعىن سۇرانىسقا يە ماماندارمەن قامتاماسىز ەتۋ ماقساتىندا مەملەكەت 9-سىنىپ تۇلەكتەرىنە تەگىن ءبىلىم الۋ مۇمكىندىگىن جاساپ جاتىر, دەپ حابارلايدى Egemen.kz.
بۇگىندە تەحنيكالىق جانە كاسىپتىك ءبىلىم بەرۋ جۇيەسىندە 772 كوللەدج جۇمىس ىستەيدى, وندا 565 مىڭ ستۋدەنت ءبىلىم الىپ جاتىر.
بيىل سۇرانىسقا يە تەحنيكالىق جانە كاسىپتىك ءبىلىم بەرۋ بويىنشا تەگىن وقۋمەن قامتىلاتىن ستۋدەنتتەر سانى 153 مىڭدى قۇرايدى, (بىلتىرعىدان 10 مىڭ ورىنعا ارتىق) مەملەكەتتىك تاپسىرىستىڭ 70%-ى تەحنيكالىق ماماندىقتارعا, ونىڭ ىشىندە ماشينا جاساۋ, كولىك, ەنەرگەتيكا, IT, قۇرىلىس جانە باسقا دا سالالارعا باعىتتالاتىن بولادى.
«نەگىزگى باسىمدىق – باسەكەگە قابىلەتتى ماماندار دايارلاۋ, ءبىلىم بەرۋ مەكەمەلەرىن زاماناۋي ماتەريالدىق-تەحنيكالىق بازامەن تولىق قامتاماسىز ەتۋ, پەداگوگتەردىڭ بىلىكتىلىگىن ارتتىرۋ. قازىرگى تاڭدا كاسىپتىك-تەحنيكالىق ءبىلىم بەرۋ جۇيەسىن ترانسفورماتسيالاۋ بويىنشا كەشەندى جۇمىس جۇرگىزىلىپ جاتىر, بۇل مەملەكەتتىك تاپسىرىستىڭ كولەمىن ۇلعايتۋدى, ءبىلىم بەرۋ باعدارلامالارىنا ۇزدىك حالىقارالىق تاجىريبەلەردى ەنگىزۋدى, كاسىبي شەبەرلىك چەمپيوناتتارىن وتكىزۋدى قامتيدى. سونداي-اق, كاسىپورىندار ءۇشىن ءدۋالدى وقىتۋ جۇيەسىن دامىتۋ جانە مامانداردى دايارلاۋ ماقساتىندا بيزنەس قۇرىلىمدارى مەن ينۆەستورلاردى تارتۋ جوسپارلانىپ جاتىر», دەپ اتاپ ءوتتى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆ.
وقۋ-اعارتۋ مينيسترلىگىنىڭ ءباسپاسوز قىزمەتىنىڭ ءمالىم ەتۋىنشە قازىرگى ۋاقىتتا كوللەدجدەرگە 518 كاسىپورىن شەفتىك قامقورلىق كورسەتەدى, ولاردىڭ سانىن 4 مىڭعا جەتكىزۋ جوسپارلانىپ وتىر. سونىمەن قاتار جۇمىس بەرۋشىلەرمەن بىرلەسىپ, كاسىپتىك ستاندارتتار مەن مەملەكەتتىك جالپىعا مىندەتتى ءبىلىم بەرۋ ستاندارتتارى جانە WorldSkills ستاندارتتارىنىڭ تالاپتارىن ەسكەرە وتىرىپ, 8 مىڭعا جۋىق ءبىلىم بەرۋ باعدارلاماسى ازىرلەندى. بيىل كوللەدجدەر مەن جۇمىس بەرۋشىلەر 2 مىڭنان استام ءبىلىم بەرۋ باعدارلاماسىن ازىرلەيدى جانە وندىرىستىك بازادا 2 مىڭ پەداگوگ تاعىلىمدامادان وتەدى.